ISundowns nethuba lokukhathaza amaqembu ngokuvula igebe kweyeligi
IMamelodi Sundowns inethuba lokuba yiqembu lokuqala ukufinyelela kumaphuzu angu-40 kule sizini ka-2022/2023 yeDStv Premiership.
Ompetha beligi banamaphuzu angu-37 emidlalweni engu-15. Bazobhekana neChippa United emdlalweni wePremiership eLoftus Stadium, ePitoli, ngoLwesibili ngo-7.30 ebusuku. Ukuwina lo mdlalo kweSundowns kuzosho ukuvula igebe lamaphuzu angu-13.
ISundowns ibukeka izowina isicoco seligi futhi njengoba ibilokhu yenza kumasizini edlule. Lokhu kuzosho ukuthi izobe isishiya iSuperSport United ngamaphuzu angu-13, yiRichards Bay ngawu-14, yiKaizer Chiefs ngawu-16 neRoyal AM ngawu-20.
Konke lokhu kubukeka kuzowakhathaza amaqembu azama ukubangisa iSundowns njengoba nemidlalo seyifinyelele ku-15, okuchaza ukuthi isizini isiphakathi nendawo. ISundowns ishaye iSwallows FC ngo 2-0 ngempelasonto nokuyenze yazinza esicongweni.
IChilli Boys abazobhekana nayo ayikaze ibashaye selokhu kwathi nhlo. Emidlalweni engu-19 edlalwe yiDowns neChippa, Abafana Ba’style bawine engu-12 kwathi eyisikhombisa yaphela lingekho elifune ukugoba uphondo. Njengamanje iChilli Boys isendaweni yesishiyagalolunye kwilogi ngamaphuzu angu-19 emidlalweni engu-15. Uma ingenza umlingo ishaye iDowns ingakhuphukela endaweni yesihlanu kwilogi ngamaphuzu angu-22.
Abadlali okumele babhekwe yiChippa kwiSundowns uCassius Mailula, u-Allende, noGaston Sirino. ISundowns ayikaze idedele igoli emidlalweni emihlanu edlule. Yagcina ukudedela igoli ngesikhathi ishaywa yi-Orlando Pirates ngo 3-0 emdlalweni weMTN8 nyakenye.
Sdina Ngubo
