Ukhala ‘ngokubanjelwa’ kweSundowns oweRichards Bay
SIHLE NGUBO
‘Angazi ukuthi leya mizuzu emihlanu iqhamuke kuphi, kodwa leya mizuzu emihlanu isibulele nje kakhulu.’
Lawa kube ngamazwi kaVusumuzi “Kanu” Vilakazi ngemuva kokuthi iqembu lakhe liyidedele ekugcineni lishaywa yiMamelodi Sundowns.
Abafana Ba’Style baguqise iNatal Rich Boyz ngo 1-0 emdlalweni weDStv Premiership eLoftus Stadium, ngoLwesibili ebusuku.
Igoli likaJunior Mandieta lingene sekusele amanenjana kuphele umdlalo nokuyinto emephule inhliziyo uVilakazi.
Bese kwengezwe imizuzu emihlanu uVilakazi ashaya amakhala ngayo.
“Sihlulwe ukubeka imiqondo emdlalweni ekugcineni.
“Ngicabanga ukuthi abadlali bese becabanga ukuthi umdlalo usuphelile nokube yiphutha elikhulu,” kusho uVilakazi.
“Sizofunda kulokhu bese sizama ukwenza kangcono emdlalweni wethu olandelayo.
“Sizothatha okuhle kulokhu bese sibheke phambili.”
Phambili iBay ilindwe yiMoroka Swallows nayo engafuni ukuzibona ilokhu isondela ezembeni.
Amaqembu abukeka eqhweba ihlathi iyona iBay neCape Town Spurs abanamaphuzu angu-14, nangu-12 ngokulandelana.
ICape Town Spurs izobhekana neChippa United emdlalweni weDStv Premiership eNelson Mandela Bay Stadium ngoLwesithathu ngo-7.30 ebusuku.
FUNDA NALA:Â URonaldo uhlaze uPitso bemnenebula ngembudlu yamagoli
Uma ingabuya namaphuzu aphelele eGqeberha kungasho ukuxebuka emsileni kwilogi yeDStv Premiership, okokuqala selokhu kuqale isizini
