Ungene emabhukwini omlando uRonwen Williams weSundowns
By Alfred Ngubane
Unozinti weMamelodi Sundowns uRonwen Williams usengene emabhukwini omlando ngokunganenelwa goli emidlalweni engu-18 kwisizini eyodwa.
Irekhodi lalokhu bekungelemidlalo engu-17 unozinti engalilandi enethini ibhola nelaqoshwa nguMoeneeb Josephs esakwi-Orlando Pirates.
URonwen Williams useliqophe kabusha ke leli rekhodi ngemuva kokungangenelwa goli iSundowns inenebula iMarumo Gallants ngo 2-0 ngoMgqibelo.
Lo mdlalo weDStv Premiership wawuhlelelwe uLwesibili obuzayo kodwa wasondezwa ukwenzela ukunika lamaqembu isikhathi ngeviki elizayo.
Bobabili iSundowns neGallants bamele ngokuzimisimela iNingizimu Afrika emiqhudelwaneni yamaqembu ngaphansi kweCaf.
ISundowns ikwiChampions League la seyizibekisele khona indawo kweyandulela owamanqamu.
Izogadulisana khona nompetha abavikela isicoco iWydad Athletic yaseMorocco kulesi sigaba. Umdlalo womlenze wokuqala usekuhambeni ngoMeyi 13.
IGallants nayo isingene esigabeni semidlalo eyandulela owamanqamu kwiConfederation Cup.
Yona izobhekana neYoung Africans yaseTanzania ngeMeyi 14. Umdlalo wokuqala nayo uzoba sekuhambeni.
URonwen Williams, ongukaputeni kwiBafana Bafana, usayike kwiSundowns ngeJuni nyakenye esuka kwiSuperSport United.
Wayesehlale iminyaka eminingi impela kwiSuperSport. Abanye babenokungabaza ukuthi uzokwazi yini ukudla ijezi kwiSundowns.
Phela ufike kade kukhonya uDenis Onyango wase-Uganda ezintini zaleli qembu lasePitoli, kube kulinde uKennedy Mweene noReyaad Pieterse ngaphandle.
Nokho uRonwen Williams ukwazile ukufika angene khaxa ebholeni leSundowns futhi nguye isethenjwa kusukela afika.
Kwazi ukuthi useqophe irekhosi elisha kufanele ukube kuzomnyusela ukuzethemba lo nozinti oneminyaka engu-31.
FUNDA NALA: UPaseka Mako uthi bebephindiselela abalandeli kwiChiefs
ISundowns isisalelwe wumdlalo owodwa kwiPremiership kanti izobhekana kuwo neMaritzburg United evika izembe.
Manje seyizogxila ngokuphelele kwiChampions League la ibhekwe khona ukuthi idle isicoco okwesibili.
