Ithemba iMaritzburg ibamba iSundowns, kodwa kusaminyiwe

By Sihle Ngubo

IMaritzburg United  ibuyise ithemba lokuthi izihlala kwiDStv Premiership ngesikhathi ibambana neMamelodi Sundowns ngo 1-1 emdlalweni wokugcina  weligi eLoftus Stadium ePitoli, ngoLwesibili ebusuku.

ISundowns iqale usuku isemanzini njengoba bekufihlwa u-Alex “GoldFinger” Shakoane ngoLwesibili, obeyisikhulu sayo iminyaka eminingi.

Ibe seyiphetha usuku ngokuqukula ngokusemthethweni indebe yeDStv Premiership ka-2022/2023. 

Ngaphandle kwalokho icisho yephula izinhliziyo zabeMaritzburg United engakasindi ekuyeni ngqo ehlathini ngoba amaqembu ebanga nawo emsileni esazodlale ngoMgqibelo. 

Nokho kodwa konke akusekho ezandleni zeTeam of Choice ezobe seyimincele ukuthi iChippa United (ezodlala neLamontville Golden Arrows) neMarumo Gallants (ezobhekana neSwallows FC) bashaywe ukuze yona isinde ezambeni.

IMaritzburg isendaweni yesithathu ukusuka emsileni ngamaphuzu angu-30, kanti ilandelwa yiGallants bese kuvale iChilli Boys bobabili abanaphumuzu angu-29.

Ngasohlangothini lweSundowns bese iwina isicoco seligi okwesithupha amasizini elandelana. 

Alikho iqembu eselike lenza lokhu emlandweni weNational Soccer League (NSL) nowePremier Soccer League (PSL).

ISundowns ibidlala ngeqembu elihluke kakhulu ngoLwesibili njengoba ilungiselela ukubhekana neWydad Casablanca emdlalweni womlenze wesibili weCAF Champions League. Umlenze wokuqala uphele ngo 0-0 ekuhambeni.

Nokho iSundowns ihlukekile ukwephula amarekhodi ngoLwesibili njengoba iwine iligi ngamaphuzu angu-16. Ngesizini edlule iyiwine ngafanayo. 

Okubalulekile nokho ukuthi leli qembu lasePitoli likhale lemuka nendebe yeligi osukwini lapho belifihla khona uShakoane.

Igoli leSundowns lishaywe uSurprise Ralani ngomzuzu ka-24 ngemuva kokuthola iphasi enhle ebivela kuNeo Maema. 

FUNDA NALA: ElaseTanzania lihalela uKhama Billiat ophelelwa yinkontileka kwiChiefs

Elokulinganisa leTeam of Choice lishaywe ngu-Ali Meza ngomzuzu ka-70 labuya ithemba kwezikaFadlu Davids. 

Izinsuku ezintathu ezizayo zizobe ziwumlindelo onzima kwiTeam of Choice.