ElaseTanzania lihalela uKhama Billiat ophelelwa yinkontileka kwiChiefs

Iqembu laseTanzania iYoung Africans selikuqinisekisile ukuthi lingajabula ukuqinisa ngoKhama Billiat weKaizer Chiefs ngesizini ezayo.

Lokhu kuvezwe wusihlalo waleli qembu uHersy Ally Said ngesikhathi ekhuluma nabezindaba kuleli, kuleli viki.

Ubekhuluma ngesikhathi efika neqembu lakhe njengoba lizodlala neMarumo Gallants emdlalweni weCaf Confederation Cup.

IYoung Africans izogadulisana neGallants ngoLwesithathu kanti isendaweni engcono njengoba ihamba phambili ngo 2-0.

Yashaya iGallants ngawo isekhaya ngeviki elidlule. Kube nokukhala ke nokho kwabeGallants ngempatho nangonompempe kulo mdlalo.

USaid uthi kudala amthanda uKhama Billiat futhi uma iChiefs imdedela ekupheleni kwesizini uzogxuma ahlale.

“UKhama Billiat ungomunye wabadlali engibathandayo. Usezingeni eliphezulu kakhulu,” kusho uSaid.

“Yingakho ke ngingeke ngingabaze uma kwenzeka etholakala,” kuchaza lesi sikhulu.

UBilliat uzophelelwa yinkontileka kwiChiefs ngoJuni kodwa Impempe ike yabika ukuthi ngeke leli qembu limdedele.

Uzonikwa enye inkintileka yonyaka. IChiefs ivele inombandela wokuthi yelule uma kuphela le anayo njengamanje.

Umthombo osendelene neChiefs wasitshela ukuthi ngeke adedelwe ngoba abaqeqeshi bakholwa wukuthi kukhona asangakwenzela iqembu.

“Yingakho bemgijimise kodokotela abakhethekile ukuze asheshe alulame. Bafuna kuqale isizini ezayo engumqemane.”

UKhama Billiat usevele uqalile ukujima kwiChiefs kanti kungenzeka abonakale uma seyidlala umdlalo wokugcina weDStv Premiership ngempelasonto.

Walimala kusanda kuqala isizini kwatholakala ukuthi njengoba kwakucatshangwa ukuthi uthintekile nje.