UFadlu Davids uthi ingcindezi sebeyibeke kwiSwallows ne-Arrows
By Sbongs Gumbi
Ukube kuya ngomqeqeshi weMaritzburg United uFadlu Davids, bekuzokhishwa ithimba lamaphoyisa ekhethelo ukuyobuka imidlalo yokugcina yeDStv Premiership ngempelasonto.
Lo mqeqeshi ufisa imidlalo yokugcina yalesi sigaba ibhekwe ngeso lokhozi ukuqinisekisa ukuthi ayikho inkohlakalo eyenzekayo kuyo – ikakhulukazi le emibili yamaqembu abasemgibeni wezembe nawo.
IMaritzburg izikhiphile okwesikhashana kulo mgibe ngesikhathi ibambana neMamelodi Sundowns ngo 1-1 ngoLwesibili kusihlwa.
Ilale isendaweni ka-14. Kodwa uma iChippa neGallants benqoba kweyabo imidlalo ngempelasonto, kuyobe sekubhedile kuyo.
“Asazi noma iphuzu elilodwa lanele yini… Kodwa siyethemba. Siwubonile umdlalo wePretoria Callies,” kusho uFadlu Davids ngemuva komdlalo wabo neSundowns.
“Simzwile umqeqeshi (weCallies) uKwanele Kopo. Ngiyazwelana neCape Town Spurs. Siyibonile iTuks ijabula ngathi yiyo enqobe iligi.
“Ingcindezi thina sesiyidlulisele kwiChippa neGallants… NeGolden Arrows, abadlali bayo bazobhekwa ngeso lokhozi.
“Uma kuke kwakhona owenza iphutha kuzobuzwa ukuthi kwenzekani ngaye. Ngakho abadlali be-Arrows bazobhekwa kakhulu.
“IMarumo Gallants yona izodlala neSwallows futhi abadlali beSwallows kuzomele badlale ngokucophelela ngoba nabo bazobe begadiwe.
“Kodwa uma ucabanga okushiwo uKwanele Kopo, uyazi kumele kwenzekeni. Wonke umuntu uzobe ebheke ngeso lokhozi okwenzekayo kule midlalo.
“Ngabe iSwallows izokulwela ukungena kwiTop 8? Noma khona ozoziwisa ngasebhokisini bese izitha zishaya igoli?
FUNDA NALA: Ithemba iMaritzburg ibamba iSundowns, kodwa kusaminyiwe
“Izwe lonke lizobe libuka le midlalo. Ngethemba ukuthi le midlalo izovezwa bukhoma ukuze sigadisise,” kusho uFadlu Davids.
IChippa izoqedela imidlalo yayo eThekwini la izobhekana khona ne-Arrows. IGallants yona izobhekana neSwallows ekuhambeni.
