UJannet Mbhele weXcel wavala ihlazo leKZN kwiComrades

I-Xcel Running Club igile izimanga kwiComrades Marathon njengoba uJannet Mbhele eyitholele ephume kwabokuqala abalishumi esigabeni sabesifazane.

Yilo leli qembu eligqibe ihlazo leKwaZulu-Natal kulo mjaho ngokuba nomsubathi ongene kwabokuqala balishumi.

Omunye umgijimi wale nhlangano, u-Ayanda Ngcobo yena wazihola phambili kwabesilisa kodwa waphuma ebangeni lika-60m.

Ekhuluma neMpempe, uJannet Mbhele uthi ubonga umqeqeshi wakhe omcushisile ukuze akwazi ukuthola le ndawo aphume kuyo.

“Wangitshela ukuthi kusele abasubathi ababili phambi kwami. Wathi angiqinise ezinyaweni,” kusho le ntokazi ebuyigijima okokuqala iComrades.

“Nebala ngenze njalo, ngakwazi ukubadlula.” UJannet ubegijima iComrades Marathon yakhe yokuqala futhi bekungabhekiwe akwenzile.

Ngaphambi komjaho isikhulu seXcel uMandla Mngomezulu satshela Impempe ukuthi uyozwa amanzi ngobhoko.

Wathi ufuna ukuthi afunde okuthile futhi athole namava ukuze ngeminyaka ezayo enze kangcono.

Kodwa ukungena kwakhe endaweni yeshumi kulo mqhudelwano eqala sekwenyuse amathemba okuthi ngokuzayo uzokwenza kangcono kakhulu.