UThapelo Morena usazohlala kwiSundowns, welulelwe inkontileka
Njabulo Shezi
Welulelwe ngeminyaka emine yonke uThapelo Morena kwiMamelodi Sundowns angumdlali obalulekile kuyo.
Inkontileka yalo mdlali odlala ezindaweni ezehlukene beyizophela njengobab kusongwa uJuni kodwa leli qembu belinombandlela wokuyelula.
Libe selinquma ukwengeza iminyaka emine, ngokubika kwabeSABC Sport ngoMsombuluko ntambama.
“Impela besixoxa ngenkontileka kaThapelo (Morena),” kucashunwe imenenja yakhe uBasia Michaels isho kanje.
“Njengoba bengike ngasho naphambilini, ungumdlali omqoka eqenjini leSundowns futhi bamklomelise ngendlela efanele ngalokho.
“Kodwa ke akukhona okwami ukuveza imicikilisho yalezi zingxoxo. Kuzomele ubuze iqembu.
“Mina engingakusho nje wukuthi uThapelo (Morena) usazoba kwiSundowns isikhathi eside impela,” kusho le menenja.
Ngokwalo mbiko, iSundowns iqale yavuselela ngeminyaka emibili ilandela umbandela wenkontileka yokuqala.
Kodwa iphinde yabuya seyizobeka okungconywana etafuleni, yengeza neminye iminyaka emibili ukuqinisekisa ukuthi uyahlala isikhathi eside.
FUNDA NALA: UCraig Martin akabuyanga ejimini yePirates ngemuva kwekhefu
Njengoba ezohlanganisa iminyaka engu-30 ngo-Agasti, le kontileka isho ukuthi useyoze abe neminyaka engu-34 ekwiSundowns.
Sekungenzeka agcine ethathele kuyo umhlalaphansi. Ufike kwiSundowns ngo–Agasti ka-2016 esuka kwiBloemfontein Celtic.
