Ishwebile kuMandla Ncikazi iRichards Bay, uqhubeka kwiPirates
Njabulo Shezi
IRichards Bay igcine ingasamtholanga uMandla Ncikazi ebifuna ashiye kwi-Orlando Pirates la ayiphini khona, azoba yinhloko yabaqeqeshi kuyo.
Bekuke kwavela ukuthi leli qembu selivumelene noMandla Ncikazi kodwa manje kuvela ukuthi belisathole isibusiso sika-Irvin Khoza wePirates ukuthi lingakhuluma naye.
Ngokuthola kweMpempe, usihlalo weRichards Bay waxoxa noKhoza, ongusihlalo wePirates ecela ukuba amdedelele lo mqeqeshi.
Kuthiwa uKhoza wathi uyabakhulula ukuthi baxoxe ngqo noMandla Ncikazi, uma evuma yena ngeke abe nenkinga futhi uzomkhulula.
Kodwa ke kubukeka bengakwazanga ukumheha lo mqeqeshi okuthiwa usafuna ukufunda kuJose Riveiro noSergio Elmanara asebenza nabo kwiPirates.
Okunye okwenze kube ngumqansa kuNcikazi ukushiya kwiPirates wukuthi yimibiko yokuthi iRichards Bay ike yabhekana nezinkinga zezimali ngesizini ephelile.
“UMandla (Ncikazi) akakufihli ukuthi kukhona izinto ezintsha azifuna kuRiveiro ezizomakha, abe ngumqeqeshi ongcono.
“Manje bekungeke kube lula ukuthi ahambe, ikakhulukazi aye eqenjini okunezindaba ezibuye zivele ezingezinhle.
“Naye uyathanda impela ukusebenza ngokuzimela ukuze aveze ikhono lakhe, kodwa ubone kungesona isikhathi esifanele lesi,” kusho umthombo.
UNcikazi kumanje usekhenmpini nePirates eRustenburg la leli qembu liqale khona amalungiselelo okuqala esizini entsha.
Kuzothi ngoJulayi 9 iPirates iqoqe imithwalo bese ifudukela eSpain la izoqedela khona amalungiselelo.
FUNDA NALA: Ilandele iPirates noSuthu iBlack Leopards ngomqeqeshi waseSpain
Kula izodlala khana nemidlalo yobungani yokuzikala ukuthi seyilungekangakanani njengoba kubhekwe lukhulu kuyo kule sizini.
Ukuwina izindebe ezimbili ngesizini edlule kubalolile abalandeli bayo asebefuna kulokhu ihubhe isicoco seligi neseCaf Champions League.
