Kugqame u-Arendse amaBhokobhoko ekorobha nge-Australia
Sihle Ngubo
UKurt-Lee Arendse ube yiqhawe leNingizimu Afrika ebeka ama-try amathathu amaBhokobhoko eshaya i-Australia ngo 43-12 emdlalweni wokuqala weCastle Lager Rugby Championship, eLoftus Stadium, ngoMgqibelo.
AmaBhokobhoko akwenze kwalula ukushaya ama-try kulo mdlalo azitholela iphuzu lebhonasi njengoba egcine ethole ayisithupha. IWallabies iyona ebuvule inkundla nge-try kaMarika Koroibete ngomzuzu wesishiyagalolunye.
Ngemuva kwalokho kube sekugiya iqembu lasekhaya njengoba unombolo 10 uManie Libbok eshaye iphenathi kwaba ngu 5-3. Zishintshe kungu 17-5 ngemuva kwama-try amabili ka-Arendse ngomzuzu ka-16 noka-30.
UReece Hogde yena ugeje amaphenathi amabili ngaphambi kokuthi ziye ekhefini, nabengenza umehluko omkhulu.
Ngesiwombe sesibili iWallabies abenza amaphutha aholele ukuthi u-Arendse ashaye itry yakhe yesithathu ngomzuzu ka-52, kwase kwaba yiphenathi try ehambisane nekhadi eliphuzi ngomzuzu ka-54.
INingizimu Afrika iphinde yathola enye iphenathi try ngomzuzu ka-69 ngenxa yamaphutha eWallabies.
Akasalanga noPieter-Steph du Toit njengoba eshaye eyakhe itry ngomzuzu ka-75.
IWallabies igcine iyitholile eyayo itry yesibili eze noCarter Gordon ngomzuzu wokugcina.
Emlandweni wemidlalo yamaTest eLoftus Stadium, phakathi kweNingizimu Afrika ne-Afrika, amaBhokobhoko aseyiwine yonke eyisishiyagalombili ayidlale neWallabies kule nkundla, kusukela ngo-1963.
FUNDA NALA: URowan Human uphawula ngokugxekwa kwabo uKadodia
Kuyacaca ukuthi i-Australia ihlale ibuya nenduku ePitoli futhi amaBhokobhoko awakafuni ukukushintsha lokho.
