UKodwa uzongenelela kweyamabhonasi abeBanyana Banyana

Intatheli yeMpempe

Uzophinde angenelele ungqongqoshe wezeMidlalo kuleli uZizi Kodwa osezwakalise ukukhathazeka ngezigigaba zakamuva ekhempini yeBanyana Banyana. 

Kumanje kunomdonsiswano okhona phakathi kwenhlangano eyengamele ibhola kuleli, iSouth African Football Association (iSafa) ngodaba lwamabhonasi abasebenzi bayo abahambe neBanyana. 

Ngokubika kwabeSABC Sport mpelasonto, njengoba sekusele izinsuku eziyisithupha kuphela ngaphambi komdlalo wokuqala weBanyana Banyana eNdebeni yoMhlaba, iSafa ayikaziphothuli izingxoxo zamabhonasi. 

ISouth African Football Players Union (Safpu) ikuqinisekisile kule mpelasonto edlule ukuthi iSafa ibuye yajika kokwakuvunyelwene ngakho. 

Ithi iSafa isichithile isiqinisekiso esakhishelwa umphakathi esithangamini nabezindaba emavikini amabili edlule sokuthi abasebenzi bazokhokhelwa uhhafu (R115 000) wamabhonasi ka-R230 000 ayethenjiswe abadlali.

Nokho, iSafa, eyayikhona kulo mhlangano nabezindaba, ikhiphe isitatimende ngeSonto iphikisana nalesi samba. Iphinde yaveza ukuthi ayiwakhokhi amabhonasi omqhudelwano kubasebenzi.

Njengoba uZizi Kodwa ayixazulula le ngxabano yokuqala yeBanyana Banyana ngaphambi kokuthi iye eNew Zealand ekuqaleni kwenyanga, ukugcizelele ukuthi iSafa yamnikeza isiqiniseko sokuthi lolu daba luzoxazululwa.

“Izindaba zokucwasa kumele silwe nazo ukuze kuthi uma kunezingqinamba noma kukhona okungakahlangani phakathi kobuholi beSafa bangithembise futhi bazibophezele ukuthi bazozixazulula kusasele izinsuku ezimbalwa uphele umqhudelwano. ” kusho uKodwa.

“Okungikhathaza kakhulu, ngesikhathi ngiyifunda ezinsukwini ezimbalwa ezedlule – hhayi eNingizimu Afrika kuphela… 

“Kunamazwe amaningi angazixazululi izinkinga zezinkontileka nabadlali, ngikhuluma ngamanye ahamba phambili, amazwe athuthukile.

“Futhi kuyangikhathaza ukuthi kwenzeka ebholeni labesifazane kuphela. Ebholeni labesilisa, awuzwa lutho ngalezi zindaba.”

UKodwa, naye owayewuhambele lo mhlangano nabezindaba ngoJulayi 5, ufunge wagomela ukuthi uzoxoxisana neSafa nalokhu osekwenzeka uva nje. 

FUNDA NALA: Kungani u-Andile Jali eqoke iSwallows, wagabha ezinye izesheli

“(Asiphoxekile) ngoba, njengoba ngishilo, akuyona nje into yaseNingizimu Afrika kuphela le. 

“Ngicabanga ukuthi akulungile neze ukuthi sekuseduze kanje nomqhudelwano, sisaxoxa ngalezi zindaba.”