Kungani u-Andile Jali eqoke iSwallows, wagabha ezinye izesheli
Njabulo Shezi
Oguqukweni olumangaze abalandeli bebhola baseNingizimu Afrika, owayengumdlali weMamelodi Sundowns u-Andile Jali ujoyine iMoroka Swallows.0
Ikusasa lika-Andile Jali bekuwundabamlonyeni kusukela kwamenyezelwa ukuxoshwa kwakhe kwiSundowns ezinyangeni ezimbili ezedlule.
Kusukela lapho, abalandeli beKaizer Chiefs ne-Orlando Pirates banxuse abaphathi babolamaqembu ukuthi bayengele lo mdlali wasesiswini emaqenjini abo.
UJali uke waxoxisana nezikhondlakhondla zaKwaZulu-Natal, AmaZulu FC kodwa kwangavunyelwana, nezingxoxo zahoxiswa.
Kodwa ngoLwesihlanu kuphele ukuqagela ngesikhathi iZinyoni zaseDube zimemezela ukuthi u-Andile Jali usezogqoka imibala yaleli qembu.
UJali uphumele obala ngesinqumo sakhe sokujoyina iSwallows. Lo mdlali, oneminyaka engu-33, usayine inkontileka yeminyaka emibili nalezi zinkunzi zaseSoweto.
Ngesikhathi ethulwa yiSwallows, uJali uzwakalise ukubonga kusihlalo weqembu wavuma ukuthi ulinde isikhathi eside ngaphambi kokuthi asayine phansi.
Uti wayekubeke kwacaca kuMike Makaab, imenenja yakhe, ukuthi ufisa ukuqhubeka nomsebenzi wakhe eGoli, okuyidolobha aselithanda.
IMoroka Swallows isebenzise leyo ntuba ke ukuheha lo mdlali ukuthi asayine kuyo.
Sekuphothulwe isivumelwano, uJali ukhulume ngesasasa nenjabulo yakhe, wathi iMoroka Swallows yikhaya lakhe elisha.
“Ngifuna ukubonga usihlalo weqembu kuqala,” kusho uJali engxoxweni abe nayo nomsakazo waKwaZulu-Natal, iGagasi FM.
“Sengilinde isikhathi eside ngaze ngasayina inkontileka. Ngathi kuMike, ‘Angifuni ukusuka eGoli, ngakho-ke kungcono ngibe seGoli’.
“Yilapho iSwallows ifike kungekho muntu ocabanga ukuthi ngingaya kwiSwallows. IMoroka Swallows iyikhaya lami elisha, ngijabule kakhulu.
“Futhi ngijabule kakhulu ukuthi ikilabhu ingisayine ngoba ikholelwa kimina.”
Usihlalo weSwallows, uDavid Mogashoa uthe uJali ube ngumdlali wokuqala ukusayinwa yiZinyoni zaseDube njengoba zibheke ukuzivuselela nje.
FUNDA NALA: ULesedi Kapinga ufunde ‘ukukhetha kahle’ ngokugilwa yiSundowns
Leli qembu lisanda kulanda umqeqeshi ohlonishwayo uSteve Komphela kanti kulindeleke ukuthi lilande abanye abadlali abambalwa abazoqinisa iqembu.
