Isola iChiefs ngokudukisa abalandeli imenenja kaKhama Billiat
Alfred Ngubane
Imenenja kaKhama Billiat, uGodfrey Busaka isola iKaizer Chiefs ngokudukisa abalandeli ngokwenzeka ngalo mdlali okubikwe ukuthi ‘udukile’.
IChiefs ikhiphe isitatimende ngeviki elidlule ithi ayimtholi uKhama Billiat njengoba ilindele aphendule ngokuthi uyayemukela yini inkontileka entsha anikwe yona.
UBusaka uthi lo mdlali wakhe uyafuna ukusayina inkontileka entsha neChiefs kodwa leli qembu kumele likhulume iqiniso ngokubangwayo.
Ebuzwa ukuthi njengamanje muphi lo mdlali, uphendule ngokuthi ukhona ekhaya ulinde ukuzwa ukuthi uyaphi.
Le menenja ithi izingxoxo zafika kwangqingetshe ngoba kukhona abangavumelani ngakho, yingakho lo mdlali ekhethe ukuma ekujimeni neChiefs.
“Ukungaphenduli izigcingo zeKaizer Chiefs kwenziwa wukuthi yena akayona imenenja,” kusho uBusaka.
“Yimina imenenja kaKhama Billiat. Manje njengoba bengafuni ukuxoxisana nami angazi bafuna ukumisa kanjani.
“UKhama ngumdlali omdala kakhulu uyayazi into ayifunayo,” kusho uBusaka ecacisa okwenze lo mdlali ame ejimini.
Uthe ubona sengathi sekufike la kuzohlukana khona izindlela ngoba kukhona ukungaboni ngasolinye kubo neChiefs.
“Ngibona emancane amathuba okuthi uKhama Billiat angabuyela kwiKaizer Chiefs njengoba bengasiniki esikucelayo kubo.
“Yingakho nathi seqalile ukubheka engxenye manje. Ubudlelwano bethu neKaizer Chiefs ngicabanga ukuthi sebonakele ngempela manje.
“Phela ngeke ngempela sivume abakushoyo esingakudingi,” kuphetha uBukasa oyimenenja esinamava nesisebenze nabadlali abahlukene abanamagama.
Uphinde waveza ukuthi kukhona amanye amaqembu amaqembu asenhla ne-Afrika amfunayo uKhama Biliat.
FUNDA NALA: Isicentiwe indlela ebheke e-USA kuMailula weSundowns
NelaseTanzania, iYoung Africans beyike yaluveza uthando lwalo ngoBilliat, lathi lizolinda libone kwenzakalani ngaye kwiChiefs.
