Isicentiwe indlela ebheke e-USA kuMailula weSundowns

UCassius Mailula ubukeka ezoyishiya nakanjani iMamelodi Sundowns ngaphambi kokuthi kuqale isizini entsha.

Lo mdlali, oshaye into ecokeme kuBafana Ba-Style neBafana Bafana ngesizini edlule, uyinyama emaqenjini ehlukene.

Ngokombiko weSABC Sport iqembu eligijima kwiMajor League SSoccer, iToronto FC, selibeke u-R30 million etafuleni ngenhloso yokusayinisa lo mdlali.

Kuvela ukuthi uMailula uzohlolwa yileli qembu lase-USA futhi kubhekeke ukuthi asayine kuleli qembu nakanjani bese ashone khona eMelika.

Abanye abadlali bakuleli abagila izimanga e-USA oNjabulo Blom, obedlalela iKaizer Chiefs noBongokuhle Hlongwane obekwiMaritzburg United.

UBlom noHlongwane kuthiwa sebehlonishwa kakhulu e-USA njengoba bedlala ibhola elinenkosi phakathi.

No-Olwethu Makhanya obekwiStellenbosch FC ngesizini edlule usezogijima kule ligi njengoba esayinwe yiPhilledelphia FC yakhona e-USA.

Kuke kwavela nokuthi uRonwen Williams ongunozinti weSundowns kukhona iqembu lakhona e-USA elimfunayo.

Kuyacaca ukuthi amaqembu aseNingizimu Afrika asazoyakha imali edayisela amaqembu eMSL abadlali.

Kubukeka sengathi ukudlala kahle kukaBlom noHlongwane kuhlahlelele abanye indlela yokuyogijima kule ligi osekudlala kuyo noLionel Messi.