UMark Harrison ugxeka imenenja kaBilliat ngokuhubha imali
Alfred Ngubane
Umqondisi wezemidlalo kwiMighty Wanderers yaseMalawi, uMark Harrison uxwayisa amaqembu akuleli ngobungozi bezimenenja zabadlali baseZimbabwe.
UMark Harrison uthi uKhama Billiat uphushwe imenenja yakhe uGeoffrey Bukasa ukuthi ashiye isinyelela kwiKaizer Chiefs.
“Lokhu ukwenze ngokufuna imali eningi kakhulu kwiChiefs,” kuchaza uMark Harrison engxoxweni ekhethekile neMpempe kuleli viki.
“Bekumele aqale abheke ukuthi lo mdlali uyenzeleni iChiefs njengoba engakaze anqobe lutho nje kusukela afika.
“Kunalokho ubehlushwa wukulimala njalo. Eqinisweni nje bekumele iChiefs ingayivuseleli inkontileka yayo nalo mdlali ngoba ngeke vele ayisize ngalutho,” kucahza uHarrison.
UMark Harrison, ongowokuzalwa e-England, uqeqeshe emaqenjini ehlukene eZimbabwe, eMalawi naseBotswana.
Kuleli uke wasebenza isikhashana kwiBaroka FC, Black Leopards, Free State Stars, Chippa United neGolden Arrows njengoba manje ekwiWanderers eMalawi nje.
Uthi izimenenja zihlupha ngokujaha imali, bese zikhohlwa wukubhekelela kahle inhlalo nekusasa lo mdlali ezimphethe.
“Manje lezi zimenenja zibeka imali phambili, zikhohlwe yisimo somdlali. Mina ngisebenza nabo, ngiyabazi,bayahlupha.
“Bavele baqhamuke sebethi badlalisele umdlali wabo ebe engekho esimweni sokudlala,” kuchaza yena.
“Uyabona abadlali nezimenenja zabadlali baseZimbabwe bacabanga ukuthi amaqembu adlala kwiDStv Premiership awumbele ogwansile.
“Uma sikhuluma iqiniso nje, uBilliat wagcina ukudlala ibhola langempela kwiMamelodi Sundowns. Wagcina lapho nami bengisengumqeqeshi ngaleso sikhathi.”
Njengamanje kuvela ukuthi uBilliat uzanyelwa amaqembu phesheya nasenhla ne-Afrika. Impempe ithole ukuthi kumanje akekho kuleli, kodwa useTurkey la ayozama khona.
FUNDA NALA: UNomvelo ubuye ngegiya eliphezulu ngezimpi eziholwa ekaDlomo
Ngaphambi kokuya lapho, uke wabonakala kwenye yezindawo zokuzijuxuza ngakubo eZimbabwe ehamba nosaziwayo bakhona eHarare.
