BUKA: IChippa yemukela umdlali omusha ngekaVelaphi Mjongeni
Njabulo Shezi
IChippa United isebenzise ividiyo yomdlalo wethelevishini owawudlisa kudala uVelaphi ngesikhathi yethula umdlali wayo omusha.
Lo mdlalo wamahlaya ungeminye abathandi bemidlalo yethelevishini abangayilibali ngenxa yamahlaya ayeqhululwa kuwo.
Leli qembu lase-Eastern Cape lisebenzise isiqalo salo mdlalo yabe seyisiphelezela ngombhalo othi: ‘Wemukelekile eMpuma-Koloni”
IChippa beyemukela umdlali wasesiswini embolekwe yi-Orlando Pirates uGoodman Mosele. Lo mdlali uzogijima kwiChippa ngesizini ezayo.
UMosele ungomunye wabadlali abanekhono elihle kodwa kuyacaca ubekude ukuthola ijezi kwiPirates kwazise inenqwaba yabadlali abadlala indawo efanayo naye.
Ngesizini edlule umqeqeshi uJose Riveiro ubethembele kakhulu kuMiguel Timm noThabang Monare esiswini maphakathi nenkundla.
FUNDA NALA: Uthembisa iKaizer Chiefs ehlaselayo koweTownship Rollers
Kulokhu kwengezwe ngoSiphelo Baloni okuthiwa ufike wangena khaxa esitayeleni seqembu okwenze kwadedelwa oColluns Makgaka njengoba noMosele esebolekisiwe nje.
Kuzokhumbuleka ke nokuthi iChippa ivele isike yamangaza abaningi ngesikhathi ikhipha isikhangiso sokuthi abadlali abafisa ukudlala kuyo abafake izicelo zomsebenzi.
Lokhu bekungokokuqala iqembu lebhola elikhokhelayo lenza kanjena njengoba kuvamise ukuthi libabize bezohlolwa ikhono.
Noma ke lithumele izinhloli zalo ukuba ziyohlwaya ithalente emiqhudelwaneni ehlukene ukuze lithole abadlali.
Buka nansi ividiyo ngezansi:
