UHotto ubalwa kwabangase bashiye kwi-Orlando Pirates
Njabulo Shezi
I-Orlando Pirates isenze umsebenzi oncomekayo ekusayineni abadlali abasezingeni eliphezulu njengoba kuvulwe iwindi lokudayiselana ngabadlali nje.
Nokho njengoba kufika abasha nje, kufanele kube khona nabahambayo ukuze kuvuleke izikhala ezanele, ingagcini inabadlali abaningi kakhulu.
Abadlali abafana noTerrence Dzvukamanja, uSiphesihle Ndlovu noNtsako Makhubela sebevele bahambile kuleli qembu laseSoweto.
UDvukamanja noNdlovu badayiselwe iSuperSport United kanti uMakhubela yena ukhululiwe kulandela ukuphela kwenkontileka yakhe.
Njengamanje lo mdlali obebolekiswe kwiGolden Arrows ngesizini edlule kuvela ukuthi ujima neMoroka Swallows ngenhloso yokuheha iso likaSteve Komphela.
Ezakamuva eziphuma kwi-Orlando Pirates ziveza ukuthi uGoodman Mosele naye usehambile njengoba esebolekiswe kwiChippa United.
Kulindeleke nokuthi inkontileka kaKwame Peprah inqanyulwe njengoba lo mdlali esecele ukuba kwenziwe njalo ukuze ayozama kwenye indawo.
Lo mgadlo waseGhana ubebolekiswe kwiMaritzburg United ngesizini edlule, wehluleka ukuyisiza njengoba igcine idliwe yizembe nje.
URonaldo Maarman kulindeleke ukuthi abuyele kwiChippa abebolekiswe ngesizini edlule, kanti angase ahambe noThabiso Sesane odlala emuva kulokhu.
Nokho neGolden Arrows kuvela ukuthi iyamfuna uSesane obebolekiswe kwi-All Stars ngesizini edlule.
Khonamanjalo, unozinti omusha we-Orlando Pirates emthenge kwiDondol Stars, uSphamandla Gumede kuthiwa uzobolekiswa kwiOrbit College.
Leli qembu, okuyilo i-Orlando Pirates eyathola kulo uThembinkosi Lorch, linyukele kwiMotsepe Foundation Championship lisuka kwi-ABC Motsepe League ekupheleni kwesizini edlule.
UBongani Sam yena usebuyele kwiMoroka Swallows abebolekiwe kuyo ngansizini edlule kodwa kubukeka engase abuyiswe ingakaqali isizini.
Lokhu kungenxa yokuthi iSuperSport iyiphela endlebeni kwiPirates ifuna ukudayiselwa uDeon Hotto naye okuvela ukuthi engakujabulela lokho.
Uma ehamba uHotto, osezodlala emuva kwesokunxele kwiPirates, leli qembu lizosala lingenabo abadlali basemuva kwesokunxele abenele.
Izingxoxo phakathi kwePirates neSwallows zisaqhubeka ngokusiselana ngomgadli uTshegofatso Mabasa odlale kahle kwiCosafa Cup neBafana Bafana.
FUNDA NALA: USiyanda Xulu nesizathu esimenze aqoke iSuperSport
Kusangenzeka ke futhi nokuthi unozinti osenamava nosekhulile uSiyabonga Mpontshane adedelelwe AmaZulu FC okuthiwa ayamhalela.
Kuzo zonke lezi zigigaba, ihhovisi le-Orlando Pirates liyaphithizela. Iwindi lokudayiselana ngabadlali alikakavalwa futhi lisekude futhi kuningi okusangenzeka.
