Ucelelwa itoho uKudakwashe Mahachi osephenduke unukani
Alfred Ngubane
Imenenja yabadlali kuleli uMike Ngobeni unxenxa amaqembu aseZimbabwe adlala kwiCastle Lager League ukuthi anikeze uKudukwashe Mahachi ithuba lokudlala.
Lo mdlali, oneminyaka engu-29 waxabana nowayengunkosikaziwakhe uMartha Ndlovu. Le ngxabano yadlulela endodaneni yabo ayayineminyaka emine ngaleso sikhathi.
Kwavela izinsolo zokuthi uyishisile uMahachi le ngane yakhe ephila nokukhubazeka.
Lezi zinsolo zaqhuma ngesikhathi uKudakwashe Mahachi edlala kwiSuper Sport United eyaphoqeleka ukumxosha ngenxa yobubi balezi zinsolo ayebhekene nazo.
Wavulelwa icala ngalezi zinsolo kodwa inkantolo yagcina imthole emsulwa kuvela ubufakazi bokuthi izilonda ezatholakala enganeni zazidalwe yisifo sesikhumba enaso.
Inkinga ke manje wukuthi lezi zinsolo zamakhela igama elibi uKudakwashe Mahachi futhi kuze kube manje amaqembu angakubo ayamziba.
Ube naneshwa ke ukuthi ngesikhathi ephuma emaketangeni aleli cala iZimbabwe beyivaliwe ekudlaleni ebholeni lomhlaba.
Lokhu bekusho ukuthi abadlali bakhona abakwazi ukuphuma bayodlala ngaphandle.
“Isimi sibi kuye, amaqembu aseZimbabwe awasholutho ngalo mdlali, kusho uNgobeni.
“Okuxakayo wukuthi phesheya kwezilwandle amaqembu ayabanika abadlali ithuba lesibili, baqhubeke nempilo.”
UMahachi ungumdlali onamava ebholeni lakuleli njengoba ekhulele lapha ngemuva kokusayinwa yiMamelodi Sundowns eseneminyaka engu-22 nje kuphela.
Ngemuva kweSundowns wadlala kwiGolden Arrows la afike wazibonakalisa, wabe eseheha amehlo e-Orlando Pirates eyamsayina.
Nokho azimhambelanga ngendlela ayengafisa ngayo izinto kuyo, wabe esedlulela kwiSuperSport la kuqale izinkinga esedlala khona.
FUNDA NALA: Ijike umqondo iPirates ngoZakhele Lepasa?
Khonamanjalo, uGibson Mahachi, oyimenenja kaKudakwashe Mahachi, uqinesekisile ukuthi lo mdlali uzilolonga yedwa, ulinde ithuba elizoqhamuka.
