‘UNgezana uzophumelela eRomania,’ ukusho uReeve Frosler
Sbongs Gumbi
Njengoba imibiko yakamuva iveza ukuthi iqembu likaSiyabonga Ngezana laseRomania i-FC SB seliqalile ukukhathazeka ngaye, usethole ukwesekwa nguzakwabo wakudala kwiKaizer Chiefs uReeve Frosler.
UNgezana ushiye iChiefs ngasekuqaleni kukaJulayi ngemali engakadalulwa okukholakala ukuthi ibalelwa ku-R20-million.
Ukuhamba kwakhe kuthuse abaningi. Kodwa iFCSB ibibukeka isimthanda lo mdlali wasemuva weChiefs.
Leli qembu laseRomania lakhala ngesikhathi ukufika kukaNgezana kubambezeleka ngenxa yezinkinga ze-visa nezimvume zokusebenza.
Futhi kwathi lapho esefika, wamukelekile ngenjabulo nenhlokomo enkulu. Waze wanikezwa inombolo yejezi abeyisebenzisa kwiChiefs, engu-30.
Lokhu kwakwenzelw aukuba azibone emukelekile futhi ebalulekile kuleli qembu lakhe elisha.
Ebonakala okokuqala edlala, engena esiwombeni sesibili emdlalweni wokuzilungiselela ngaphambi kwesizini, uNgezana wanikezwa ibhande likakaputeni.
Nokho wenza iphutha elesabekayo elaholele ekutheni iqembu ababedlala nalo lithole igoli lokulinganisa.
Selokhu iligi yaqala eRomania, uNgezana akakabonakali. I-FCSB iqhwakele esicongweni ngokuwina kathathu emidlalweni emithathu kuze kube manje.
Futhi umphathi weqembu, uGigi Becali ukhale ngesimo sikaNgezana. “UNgezana udinga isikhathi sokuzijwayeza.
“Sidinga ukumnika isikhashana sokuwayela, mhlawumbe izinyanga ezintathu noma ezine ukuze azine…
“Kodwa asilindi isikhathi eside kangako, inyanga yanele kithi,” ucashunwe esho kanje uBecali kuleli viki.
Kodwa uReeve Frosler weseka uNgezana ngokuthi uzogcina engumdlali omkhulu esigabeni esiphezulu eRomania ngoba uqinile ngokomqondo.
“Angicabangi ukuthi kulula ukuya kwelinye izwe. Ngiqonde ukuthi sibabonile abadlali beza eNingizimu Afrika bafike bathwala kanzima (ukuzinza),” kusho uReeve Frosler kuleli viiki.
“Ngakho-ke, akulula neze. Kodwa ngiyazi ukuthi uSiya uqinile ngokomqondo futhi uzonqoba noma yiziphi izinselelo abhekene nazo njengamanje.
FUNDA NALA: Kuqhilika izihlathi kuJose Riveiro ngonozinti bePirates
“Futhi ngethemba ukuthi maduze uzobuyela ekubeni ilo mdlali esimazi enguye,” kwengeza uReeve Frosler.
Lo mdlali wasemuva naye ngabe udlala noNgezana kuleli qembu kodwa yena iChiefs yenqaba ukumdedela ahambe.
