Kuzophela ‘ubungani’ babaqeqeshi koweSundowns neSwallows
Sbongs Gumbi
‘Ubungani’, uma busekhona, buzoke bubekwe eceleni okungenani imizuzu engu-90 uma uSteve Komphela esegasela eTshwane neqembu lakhe iMoroka Swallows.
EzikaKomphela zizogadulisana neMamelodi Sundowns emdlalweni weMTN8 eLucas Moripe Stadium ngoMgqibelo ngo-3 ntambama.
ISundowns iqeqeshwa uRulani Mokwena kanti basuka kude noKomphela njengoba bake basebenza ndawonye kwiPlatinum Stars.
UMokwena wayeyiphini likaKomphela. Kodwa muva nje uKomphela uyena obeyiphini likaMokwena kwiSundowns.
Nokho ukushiya kukaKomphela isigubhukane, eya kwiSwallows kulandelwe yizinkulumo zokuthi ubudlelwano bebungasebuhle – ubungani sebonakele.
Kuvele ukuthi uMokwena ubefuna uKomphela noManqoba Mngqithi baxoshwe bese eziqokela yena ithimba labaqeqeshi azosebenzisana nalo.
“Angazi noma ulwazi noma ukwazi yini,” usho kanje uKomphela uma ebuzwa ngokuthi uyazi kangakanani iSundowns.
“Phela kuhlukene. Ulwazi lufuna ukwazi ukulusebenzisa ngakho uma onolwazi kodw aungakwazi akusizi.”
“Ngakho nginalo ulwazi nokuqonda ngendlela ebesidlala ngayo (ngisekwiSundowns).
“Ngike ngabheka ukuthi badlala kanjani njengamanje futhi kukhona ukushintshwa okuncane okukhona.
“Kodwa abaqhelile kakhulu kulokhu engikwaziyo okuyimigomo etshalwe kumasizini edlule eqenjini.”
Khonamanjalo, uMokwena uthe uzogxila emsebenzini wakhe njengoba ezbhekena nalo mngane wakhe wakudala.
Ikhona ke ingcindezi kuMokwena njengoba ngesizini edlule iSundowns iwine isicoco esisodwa.
Kulindeleke ukuthi kulokhu ibe nazo okungenani ezimbili zakuleli bese yengeza nangeCaf Champions League esiyihlule izikhawu eziningana.
FUNDA NALA: Olunye ushintsho kolukaHappy Jele neRoyal AM
Uthe yinto ayijwayele ingcindezi ngoba kwiSundowns wonke umdlalo abawudlalayo kusuke kubhekwe ukuthi bawunqobe.
