Usihlalo weKZNA uphawula ‘ngokushayana’ kwakhe nomgijimi
SIHLE NGUBO
Ungene ehlazweni usihlalo weKwaZulu-Natal Athletics, uSteve Mukasi, ngesikhathi elwa emgwaqeni nomgijimi we-Ama-Ravens Athletics Club.
Lokhu kulandele ukuthi laba bobabili bexabane kwashunqa uthuli isikhathi eside bekhuluma efonini ngoMgqibelo.
Kuthiwa uMukasi uye wathukuthela kakhulu wacela ukuthi lo mgijimi amnike ikheli lakhe “ukuze azomshaya.”
“Umnikile ikheli umgijimi kodwa kwafike kwangahamba kahle ngoba uMukasi oshaywe yilo mfana, waze wamhudula etiyeleni,” kusho umthombo othembekile weMpempe.
Kuvele ukuthi lo mgijimi umfana osemncane kakhulu, ozalwe ngo-1998.
Ividiyo lapho kubhuquzisana lo mgijimi noMukasi ivele seyikhona ezinkundleni zokuxhumana.
Ngokomthombo ngemuva kwalesi sigameko umsunguli wamaRavens, uMthoko Khuzwayo, usabise uMukasi emtshela ukuthi umnika izinsuku ezintathu ukuthi esule njengosihlalo weKZNA.
Kuvela ukuthi uMukasi ubefuna nokukhipha isamba esithile semali ukuze lolu daba lungaphumeli emphakathini.
Impempe imthintile uMukasi ukuze izwe uhlangothi lwakhe ngalokhu okwenzekile.
Uphendule ngokungananazi wathi futhi konke bagcine bekulungisile nalo mgijimi.
“Lokhu akuhlangene nakancane nezokusubatha, ngibizwe ngondlovu kayiphikiswa,” kuchaza uMukasi kwiMpempe.
“Ngimqondile ngambuza ngalokho, okuyinto obekungamele ngiyenze.
“Sibe sesiphikisana ngamazwi. Ngibe sengenza elinye iphutha lokuthi ngithathe isikhiye semoto yakhe.
“Ukube angikwenzanga lokho besingeke sizithole sesigxavulana, silwa. Ngesikhathi sengithi ngiyahamba, ungikhubile ngase ngiwa.
“Ube esegibela phezu kwami efuna okhiye bakhe. Uthe uma esebatholile sehlukana.
“Sihlanganile makhathaleni ebesuku, sase sixoxa sobabili sesehlise umoya. Sibe sesixolisa omunye komunye sakha uxolo.”
