ISundowns nezinhlelo zokubuyisa uPercy Tau

Ukubonakala kukaPercy Tau emdlalweni weMamelodi Sundowns neKaizer Chiefs phakathi neviki sekuqinise izinsolo zokuthi lo mdlali uyabuya kuleli.

UPercy Tau, odlala kwi-Al Ahly yase-Egypt aphinde abe yiphini likakaputeni kwiBafana Bafana ubonakale kulo mdlalo wangoLwesithathu.

Yize uTau eseNingizimu Afrika ngenxa yokuthi isizini yase-Egypt isanda kuphela, iSNL24 ibike ukuthi kungenzeka angabe esabuyela.

Ngokomthombo ocashunwe kulo mbiko, ‘amathuba angu-80%’ okuthi uPercy Tau ashiye kwi-Al Ahly abuyele eqenjini lakhe lakudala.

“Njengoba sikhuluma nje, amathuba angu-80% okuthi uTau asayine kwiSundowns,” ucashunwe usho kanje lo mthombo.

“Ithimba labaqeqeshi nabaphathi (kwi-Al Ahly) babe nezingxoxo bebonisana ngekusasa lakhe.

“Ngeke ngisho kahle ukuthi kuzokwenzeka nini kodwa izinto zibukeka ziyihambela kahle iSundowns njengamanje.”

Inkontileka kaPercy Tau kwi-Al Ahly iphela ngoJuni 2024 kanti kungenzeka leli qembu limdedele manje ukuze lithole amasentshana ngaye.

NgokweTransfermarkt.com, uTau ubiza imali ebalela kuR40-million. Kuvela nokuthi leli qembu selivele limtholile umdlali ozovala isikhala sikaTau.

I-Al Ahly, engompetha lebigi e-Egypt neCaf Champions League, isayinise uReda Slim waseMoroccan obedlala kwiFAR Rabat.

Nokho okunye okuvelayo wukuthi iSundowns ingazithola seyimbanga ne-Al Wahda yase-United Arab Emirates.

Llei qembu lisanda kuqasha uPitso Mosimane njengomqeqeshi kanti unikwe igunya lokulanda abadlali abathandayo.

Uvele ke useke wazama, ngokwemibiko, ukuthola uGaston Sirino noThemba Zwane kwiSundowns.

Kuzokhumbuleka nokuthi uTau waya kwi-Al Ahly nje wayelandwe nguye uMosimane ngesikhathi esaqeqesha leli qembu.