UMokwena usola umona kuJali ngokuzama ukuphula uTeboho Mokoena

Njabulo Shezi

Ngokubona komqeqeshi weMamelodi Sundowns uRulani Mokwena, sekunenhlese yomona ngokukhula kukaTeboho Mokoena. 

Lo mqeqeshi ukuveze lokhu ngemuva komdlalo wezakhe neMoroka Swallows la ziwine khona ngengcuphe ka 1-0 kwiMTN8. 

UMokoena ushaywe ngesihluku u-Andile Jali ekuqaleni komdlalo, obekungamshiya ephuke iqakala isikhathi eside. 

Kodwa akalimalanga kakhulu futhi uJali uholelwe ngekhadi elibomvu ngalo msebenzi wakhe omubi nongadingeki ebholeni. 

Nasemdlalwe wokuqala weSundowns kwiligi, uMokoena wazithola edlaliswa kabuhlungu. 

Nakhona uVusumuzi Mncube weSekhukhune United wakhishwa ngekhadi elibomvu ngenxa yalokho. 

“Angazi noma sebeyamzingela yini uTebza,” kusho uMokwena uma ebuzwa ngalo mdlali wakhe wasesiswini. 

“Kungenzeka ukuthi ngishaya eceleni ngemizwa yami, kodwa mhlawumbe kususwe wumsindo osuke ngesikhathi enikwa indondo yokuba ngumdlali ovelele (ngesizini edlule).

“Kuningi okwakhulunywa futhi mhlawumbe lokhu osekwenzeka kusukela lapho, angazi. “Ngeshwa lakhe, lokhu kungumphumela wokuthwala kwakhe umqhele wokuba ngumdlali wesizini. 

“Kumele athole izindlela azomelana ngazo nalesi simo futhi nathi sizomsiza kulokho,” kuchaza lo mqeqeshi. 

Okuhle, okuvezwe uMokwena, wukuthi onompempe bamvikela ngendlela efanele futhi abazama ukumlimaza bahlawuliwa ngendlela ebafanele. 

FUNDA NALA: ‘Bekusifanele lokhu,’ kusho uNtseki iChiefs iwashisa iCity ijezi

“Mhlawumbe okuhle ngalento wukuthi onompempe bayalwa nayo. Kuhle ukubona onompempe bemvikela umdlali esimweni esinjena.”