Ithuba lokuphindisa izinduku zishisa kwawaseSoweto kweyeMTN8
Sbongs Gumbi
Izinkunzi zaseSoweto, i-Orlando Pirates neKaizer Chiefs sezithole ithuba lokusheshe zibuyise izinduku emaqenjini aziphoxile emidlalweni yeligi.
Imidlalo yesigaba semidlalo eyandulela eyamanqamu kwiMTN8 iqhathe amaqembu avele aseke azwana amandla kule sizini.
IKaizer Chiefs izobhekana neMamelodi Sundowns edlale nayo phakathi neviki emdlalweni weligi.
ISundowns yiyo ephume imomotheka yodwa kulo mdlalo obuseLucas Moripe Stadium seyishaye iChiefs ngo 2-1.
EzikaRulani Mokwena zidlule zizwile kwiMoroka Swallows, ziwina ngo 1-0 ngoMgqibelo. NeChiefs ibithwele uthayela kunomoya kwiCape Town City eyihlule ngo 2-1 ngeSonto.
I-Orlando Pirates yona iqhathwe neqembu eliyifakele ingcindezi liyivulisa ngenduku kwiligi, iStelllenbosch FC.
IStellies yahubhisa iPirates utalagu emdlalweni weligi, yagcina iyishaye ngo 1-0, zaphenduka ihlaya ezikaMagebhula sezithole induku kade zithenjiwe.
Kodwa ke eZimnyama, ezibukise ngeSekhukhune United esigabeni sokuqala salo mqhudelwano ziyishaya ngo 5-0, sezinethuba lokubuyisa izinduku zishisa.
IStellies ifike kulo mzuliswano ngokushaya iSuperSport United ngo 1-0 emdlalweni obusePeter Mokaba Stadium ePolokwane ngeSonto kusihlwa.
Igoli enqobe ngalo lize laqhamuka esikhathini esengeziwe njengoba umdlalo uphele zisabambene.
Bekucacile ukuthi kudlala amaqembu adlala isitayela esifanayo. Nokho u-Andre De Jongh ugcine eyilamulile.
Ushaye igoli esiwombeni sokuqala esikhathini esengeziwe kanti umqeqeshi wakhe uSteve Barker umncomile wathi wenze lento abemtshele yona.
Okokuqala leli qembu zingena emidlalweni eyandulela owamanqamu kulo mqhudelwano ezidlala okwesibili kuwo.
Nokho indlela ebheke kowamanqamu izothanda ukuqansa ke nengoba iStellies izogadulisana nePirates evutha ingabaselwe nje.
FUNDA NALA: UMokwena usola umona kuJali ngokuzama ukuphula uTeboho Mokoena
IStellies izoqala ekhaya kulo mdlalo onemilenze emibili njengoba kuyiyo etonyulwe kuqala ngesikhathi kuqhathwa amaqembu.
