I-PSL ibeka uZwane neSundowns icala ngesigameko soweMTN8

IMamelodi Sudowns nokaputeni wayo uThemba Zwane bazovela phambi kwekomidi eliqondisa ubugwegwe kwiPremier Soccer League (PSL).

Icala ezobe izoziphendulela lona iSundowns lisuka esigamekweni esenzeke ngesikhathi idlala neMoroka Swallows kwiMTN8 ngempelasonto edlule.

Ngokubika kwabeSABC Sport, iSundowns seyiyitholile incwadi eyazisa ngalesi sinyathelo esithathwa yi-PSL ngayo.

Kuthiwa icala elokuthi yabambezela ukuqala kwalo mdlalo ngemizuzu emithathu yonke okuyinto efake i-PSL nabaxhasi bayo ehlazweni.

Okwenza ukuthi kubambezeleke umdlalo wukuthi kwathi sekumele uqale, uZwane nabadlali bakhe bahamba bayoshaya umdanso wabo wokubingelela abalandeli.

Kuthe uma i-PSL seyithola umbiko wonompempe kukhomishana owayegade lo mdlalo uPatrick Marametsi yabe seyithatha izinyathelo ngokushesha.

Kuthiwa umshishisi wayo uZola Majavu ufuna ukuwasebenza ngokushesha wonke amacala avelayo ukuze angagcini esemaningi engaqediwe.

UZwane neSundowns bazonikwa izinsuku ezine kusukela bethole le ncwadi ebazisa ngaleli cala labo ukuthi baziphendulele.

Kungenzeka ke iSundowns noZwane bavele balivume leli cala bese behlawuliswa noma baqoke ukuthumela abammeli beyoliphika.