UKhenyeza uphumela obala ‘ngokungahlaliseki’ kwi-Arrows
SIHLE NGUBO
UMabhuti Khenyeza, ongumqeqeshi weGolden Arrows usephumele obala ngamahebezi okuthi akeneme ngokuthile eqenjini futhi ucabanga ukuhoxa.
Lolu daba lubikwe Impempe ekuqaleni kweviki ngemuva kokuthola ngomthombo ukuthi sekukhona ukugxambukela okukhona emsebenzini wakhe.
“Ey, uMabhuti engase ashiye naye laphaya. Ukhala ngokuthi sekukhona ukumpintsheka emsebenzini wakhe ngoba kukhona abafuna ukumlawula.
Uthi u(esigagula ngegama lesi sikhulu) usenokumtshela ukuthi akadlalise baphi abadlali, ayeke baphi,” usho lona osondelene neqembu ocele ukungadalulwa.
Nokho isikhulu esibhekelele ezokuxhumana kuleli qembu, uMqondisi Thusi wakuchitha lokhu.
Ubuye wasithinta esehleli naye lo mqeqeshi, efuna azikhulumele yena mathupha ngalokhu.
Ngeke basithande bonke singeyona imali
“Mina akekho mfowethu umuntu ogxambukela emsebenzini wami,” usho kanje uKhenyeza kule ngxoxo.
“Iqiniso ukuthi iqembu alenzi kahle kulezi zinsuku. Abantu kumele abaqonde ukuthi mina ngikhulele kuyona iGolden Arrows.
“Ngaqala ukudlala ibhola elikhokhelayo kwiGolden Arrows, ngaphinda ngawaphanyeka ethala amakhokho sengibuyele kuyo.
“Mina kusekhaya lami lesibili lapha. Bonke abasebenzi nabadlali leGolden Arrows bayangiqonda ukuthi ngisebenza kanjani.
“Abantu bayathanda ukusebenzisa izinhloso zabo ngendlela engekho,” kuqhuba lo mqeqeshi.
“Iqembu noma ngabe yiliphi liyehlelwa ngumgqigqo njengoba ubona noManchester City, Barcelona, Ajax Amsterdam, Real Madrid nje…
“Ngakho nathi sificwe yileso sikhathi. Uzokhumbula ukuthi siyiqale kahle le sizini.
“Abantu ngeke bakuthande bonke ungeyona imali, abafana bazobuyela emgqigqweni osasilahlekele,” kusho uKhenyeza.
FUNDA NALA: Izinkunzi zaseGauteng zihlela ukucela ubuhlobo obuhle kuMaZulu
Khomanjalo, iGolden Arrows ilungiselela umdlalo weDStv Premiership ezobhekana kuwo ne-Orlando Pirates eMpumalanga Stadium ngeSonto ngo-3 ntambama.
Abafana Bes’thende basalahle imidlalo emine yakamuva kulindeleke ukuthi bavuke ngePirates edlala kahle kulamalanga.
I-Arrows iyawadinga kakhulu lamaphuzu amathathu njengoba idlalela ekhaya.
