Acishe athenga ingulube isesakeni AmaZulu

AmaZulu FC acishe azithola esesimweni esifanayo neseRoyal AM ngomgadli amthengile kanti kuzotholakala ukuthi ulimele.

Lo mgadli waseGuinea, uYakhouba Barry, ufike eThekwini ezimisele ukuthi usezosayina njengoba bese kuvunyelwene ngayo yonke into.

Kodwa kuthe uma uBarry esehlolwa isimo sempilo kwatholakala ukuthi akekho esimweni esifanele ukuthi engadlala.

Ngokubika kwabe-iDiski Times, lolu nkonko oluke lwadlala kwiHoroya AC yaseMorocco lufike lubhandishwe idolo.

Kuthiwa lokhu sekwenze abaphathi babe manqika ngokuqhubeka nokumsayina lo mgadli yize beshoda phambili.

NeRoyal AM ike yazithola isesimweni esinjena futhi yiso esigcine siyiqhathe neFifa njengoba kumanje ivaliwe ukusayina abadlali nje.

Yona yasayina uSamir Nurkovic esuka kwiKaizer Chiefs kanti unokulimala anakho okwamhlalisa isikhathi engadlali.

Leli qembu labe seliphelelwa yisineke, kwathi uma kuphela izinyanga ezintathu, lamkhomba indlela.

Wabe eseyibophisa kwiFifa, ekhala ngokuthi ayilandelanga izindlela ezifanele ukumxosha, nebala yamvuna iFifa.

AmaZulu nawo abesevumelene nalo mdlali ngakho konke futhi nomengameli wawo, uSandile Zungu wayeveze ukwenama ngokugcina emtholile.

Wathi babembone eminyakeni emibili edlule ngesikhathi bedlala neHoroya kwiCaf Champions League, wathi bambona emuhle kakhulu.

Yingakho ke kuthe uma esetholakala, awangapholisa maseko AmaZulu, agijima ayomlanda kanti azothola ukuthi akasekho esimweni abecabanga ukuthi ukuso.