Uzama kwele-ABC Motsepe owayegijima kwiChiefs nePirates
Umdlali owake wagijima kwi-Orlando Pirates neKaizer Chiefs usefongqe isigqoko wayofesa eqenjini elidlala kwi-ABC Motsepe League eLimpopo.
Lo mdlali, ogcine ukubonakala esigabeni esiphezulu kwiMarumo Gallants, usezongxoxweni neSunrise FC.
Leli qembu lisanda kukhushulelwa kwi-ABC Motsepe League kanti kumanje lilungiselela ukuqala kwesizini yalo yokuqala kulesi sigaba.
UJoseph Molangoane uzilolonga naleli qembu kanti uqale kulo ngeviki elidlule, ngokubika kweFAR Post ngoLwesithathu.
Lo mdlali oneminyaka engu-35 ubudala uhlukane neMarumo Gallants ekupheleni kwesizini edlule ngesikhathi idliwa yizembe.
Ubeyingxenye yeSunrise FC ngesikhathi idlala umdlalo wobungani obuse-Oscar Mpetha Stadium eMankweng ngempelasonto edlule.
Nguye oshaye igoli abanqobe ngalo bebhekene neStar Sign FC. UMolangoane usehloliwe wodokotela beqembu futhi unethemba lokuthi uzonikwa inkontileka.
“UJoseph Molangoane ukhona la eqenjini. Usijoyine muva nje njengoba silungiselela isizini, kodwa akakasayini kuze kube sithola umbiko kadokotela,” kusho usihlalo weqembu uThabiso Thobane kwiFAR Post.
“Uhlolwe izolo (ngoMsombuluko). Njengamanje silindele umbiko kadokotela. Futhi kuze kube manje usesidlalele umdlalo owodwa.
“Ubukeka esesimweni esihle futhi sizoqinisekisa ukuthi inhlalo yakhe eqenjini iba yinhle.”
Uma kugcinwa ngokuvunyelwana, leli qembu lizobe lihlabene njengoba uMolangoane efika namava.
UMolangoane useke wadlala kwiPirates, Chiefs, Platinum Stars, AmaZulu, Chippa United neTshakhuma Tsha Madzivhandila phambilini.
FUNDA NALA: Obekuhloswe uNtseki ngoMaart, Mthethwa noCastillo koweCity
Lo mdlali ongowokuzalwa e-Alexandra, eGoli ubeyingxenye yeqembu le-TTM elanqoba iNedbank Cup ngesizini ka-2020/21 ngaphansi kobuholi bukaDylan Kerr.
