Usegwetshiwe uLorch ngecala lokumuhluza intombi
Isihlabani se-Orlando Pirates, uThembinkosi Lorch uhlawuliswe imali, walengiselwa isigwebo sokuyohlala ejele ecaleni lakhe lokushaya owesifazane.
ULorch uzohlawula u-R100 000 kanti isigwebo seminyaka emithathu silengiswe iminyaka emihlanu ngombandela wokuthi angatholakali ecaleni elifanayo kuleso sikhathi.
Lo mdlali oyintandokazi yabalandeli ubevele enkantolo kaMantshi yaseRandburg ngoLwesibili ekuseni okuyila ebeyogwetshwa khona.
Lokhu kugwetshwa kwakhe bese kuke kwahlehliswa izikhawu ezimbalwa. Ngaphezu kwalesi sigwebo, kuthiwe akumele abe nesibhamu.
NgoJuni, le nkantolo yaseRandburg yathola uLorch enecala ngokumuhluza owesifazane owayeyintombi yakhe ngaleso sikhathi.
Inkantolo yathi ngesikhathi kuqulwa icala akakhombisanga ukuzisola ngalesi senzo sakhe, futhi wazama nokukhohlisa inkantolo ngokwenzeka.
Le nhlawumo uzoyikhokha ngamahlandla ahlukene izikhawu eziyisithupha. Ngawo uLwesibili kuthiwe akashiye u-R50 000.
FUNDA NALA: Engagxuma ahlale umqeqeshi uma engaphinde abizwe kwiBucs
Kuzothi le esele ayikhokhe ngo-R10 000 ngenyanga ize iphele. Le mali uzoyikhokha enhlanganweni ebhekelele ukunqandwa kwesihlava sokuhlukunyezwa kwabesifazane, iPeople Opposing Women Abuse.
