Uqukuko kweMaritzburg uDlangalala ekhonjwa indlela
IMaritzburg United nomqeqeshi uZipho Dlangalala sebevumelene ngokuhlukana kanti lokhu kumenyezelwe yileli qembu ngoMsombuluko.
Njengamanje isendaweni yesikhombisa kwiMotsepe Foundation Championship, kanti iTeam of Choice isanqobe imidlalo emihlanu kuphela emidlalweni engu-13.
Ukwengeza kulokhu kukhathazeka, iMaritzburg isawine kanye kuphela emidlalweni yayo eyisithupha edlule.
Lokhu kuyishiye endaweni yesikhombisa kiwlogi yeChampionship. Isalele ngamaphuzu ayisithupha kwi-Orbot College ezihola phambili.
Leli qembu linengcindezi yokubuyela ngokushesha kwiligi enkulu nokuholele ekutheni kuthathwe isinqumo sokuhlukana noDlangalala.
UDlangalala, owake waba yiphini lomqeqeshi kuMamelodi Sundowns ne-Orlando Pirates, uhole iqembu emidlalweni engu-13 kuphela ngaphambi kwesivumelwano sokuhamba kwakhe.
Lesi sinyathelo siyinkomba yokuzibophezela kweqembu ekubhekaneni nezinkinga ngokushesha nokufuna indlela entsha kule sizini esele.
“IMaritzburg United nomqeqeshi uZipho Diangalala bavumelene ngokuhlukana kusukela mhla zingama-27 kuNovemba 2023.
“Lesi sinqumo kufinyelelwe kuso ngokuthula nangokuvumelana,” sifundeka isitatimende seqembu.
“IMaritzburg United ithanda ukuzwakalisa ukubonga kumqeqeshi uDlangalala ngokuzinikela, ukusebenza kanzima namagalelo akhe ngesikhathi esaphethe iqembu.
“Iqembu limfisela inhlanhla ezinhlelweni zakhe zakusasa.
“Ikilabhu izoqala ukuthungatha umqeqeshi omusha futhi izomemezela uma kuba khona izinguquko.”
Isitatimende asizange sikhulume ngokuzokwenzeka kuSimo Dladla obenguyiphini likaDlangalala futhi osanda kwenza izifundo zeCaf A Licence.
FUNDA NALA: Angazithola esenkingeni uMonare weBucs ‘oshise impama’
UDladla unesipiliyoni esiqinile kulesi sigaba futhi angaba yindoda edingwa yiMartzburg ukuze ibuyele esigabeni esiphezulu.
