Uyashiya kwelase-US owayedlala kwiChiefs

Ubonge impatho ayitholile eqenjini abedlala kulo kwi-US Major Leageue Soccer umdlali wasemuva owayedlala kwiKaizer Chiefs uTeenage Hadebe.

Lo mdlali owayedlala kwiChiefs eminyakeni emine edlule, wasuka kuyo waya eqenjini laseTurkey iMatalyspor kanti nakhona wahlala isikhashana.

Ngemuva kokuhlala iminyaka emibili kwiMatalyspor, wabe esedlulela kwiHouston Dynamo le nakuyo asehlale emibili, wanquma ukushiya.

Ngokwesitatimende salo mdlali oneminyaka engu-28 owayedlala kwiChicken in ngakubo ngaphambi kokuza kwiChiefs, akacacisanga ukuthi uyaphi manje.

“Kukho konke ukunqoba, nezikhathi ezinhle engibe nazo (kuleli qembu) sekuyiskhathi sokuvalelisa,” kubhala yena esitatimendeni.

“KwiHouston Dynamo nabaqeqeshi, uTed, uPat, u-Asher, uNick, nethimba lonke labaqeqeshi, ngiyabonga ngokungethemba kwenu.

“Ngiyohlale nginibonga nina, ozakwethu nabalandeli bonke,” kwengeya yena kulesi sitatimende asifake ezinkundleni zokuxhumana.

Yize engashongo ukuthi uyaphi, uHadebe iminyaka isamvuma ukuthi engabuyela nase-Europe njengoba engakafiki naku-30 ekubeni usenemava.

Kungenzeka ke nokho naye alandele ibhodwe eliconsayo, aye eSaudi Arabia la imali ikhiwa khona ngamahalavu.

Uzobe elandela ezinye izingqwele ezaziwayo ebholeni esezidlala kule ligi ezifana noCristiano Ronaldo noSadio Mane.

Nakuleli cishe ngeke aziswele izesheli uma kuwukuthi ufisa ukubuyela khona njengoba nakwiChiefs ahamba ngesihle engashiyanga sishiphi.

Bavele ke bayindlala kuleli abadlali basemuva maphakathi nenkundla abangamanxele futhi yena engaphenduka iyama uma engathi ufuna ukubuya.

Ubude bakhe bengeza kwikhono lakhe njengoba engu-1.89 metres ukusuka egadeni okwenza akwazi ukuhlenga iqembu emabholeni ahamba emoyeni.