UGonya uphinde wakhonya egeza igama ngoMzimela

USboniso “Tiger” Gonya ukhiphe ishobolo ngoMduduzi Mzimela, amshaya ezimpini ebezihlelwe yiHlula Dladla Boxing Promotions ngempelasonto.

UGonya ubesehlulwe ezimpini ezimbili kulandelana kanti ubuyisele isithunzi ngoMzimela, owaziwa ngelikaSgora kwezamankomane.

Umhlule ngamaphuzu. UGonya ushaye isibhakela esinenkosi phakathi futhi bekubonakala ukuthi usemkantshubomvu.

Uphinde wavala imilomo yabahleli bezimpi ekade bemqhenyela, bethi sekuphelile ngaye njengoba bebengasamqhathi nje.

Ekhuluma neMpempe ngemuva kwale mpi, uthe ubonga uHlula Dladla omnike ithuba lokuthi abuyele eringini engasathenjiwe.

“Ngibonga uDladla ngokungithemba nokunginika ithuba lokudlala umdlalo engiwuthandayo wesibhakela,” kusho uGonya.

“Mina bengingasafunwa muntu kubahleli bezimpi njengoba abanye kade beliveza elokuthi sengiphelile, ngeke ngisasidlala isibhakela.

“Bebethi kuphelile ngami, kodwa iqiniso wukuthi ngahlulwa kodwa anginelisekanga njengoba wonke lamabhokisa angihlula kwakunesandla semfene.

“Kwakuhlelwe ukuba kuqedwe ngegama lami engalisebenzela kanzima kangaka,” kuchaza yena.

Uthe ubezilungiselele ngokwedlulele ngoba efuna ukubuyisa isithunzi sakhe, akhombise ukuthi sisekhona isibhakela kuye.

“Njengoba sengiligezile nje igama lami, ngizobawisa manje abazolandela,” kuphetha uGonya.

Ukunqoba kwakhe sekumbuyisele ekubeni ngumpetha njengoba esephethe ibhande laKwaZulu-Natal esisindweni seBantamweight.