Imithetho yeSafa ngabaqeqeshi izoqeda eyoplamba
SIHLE NGUBO
ISouth African Football Association (Safa) seyiqinise imithetho mayelana nabaqeqeshi bangaphandle kwaseNingizimu Afrika, abavunyelwe ukusebenza kwiPremier Soccer League (PSL).
Phambilini bebezifikela nje abaqeqeshi bangaphandle, bangabuzwa ukuthi yiziphi izicucu abanazo zokusebenza. Nokho konke kuzoshintsha lokho kusukela ngo-Agasti ka-2024.
Ngokuqinisekisa kweTechnical Director yeSafa, uWalter Steenkamp, abaqeqeshi bangaphandle abazosebenza kuleli kumele babe nalokhu okulandelayo:
- I-Uefa Pro Licence
- I-Caf A Licence
- Abe okungasenani namava eminyaka emihlanu njengomqeqeshi uma ezoba ngumqeqeshi oyinhloko.
- Kumele kube wukuthi usewine okungasenani indebe eyodwa eminyakeni eyisikhombisa selokhu eqale ukuqeqesha.
Le mibandela kumele ukuthi izolisiza ibhola laseMzansi kungafiki noma ubani azothatha amashansi.
FUNDA NALA: Kubuye inkinga ejwayelekile yokushoda ngenkece kwiSwallows
Mhlawumbe kuzophela negama elithi ‘plumber’ okubizwa ngalo abaqeqeshi abafika kuleli kungaziwa lutho ngabo kunobhutshuzwayo.
