Basale ngaphandle abeChiefs kuqokwa eleBafana
Akukho noyedwa umdlali weKaizer Chiefs eqenjini lesizwe iBafana Bafana ezodlala kwi-Africa Cup of Nations (Afcon) e-Ivory Coast ngenyanga ezayo.
Lokhu kuhlaluke ngesikhathi umqeqeshi weqembu lesizwe, uHugo Broos, ememezela iqembu lakhe azohamba nalo ukuyoyibamba enhla ne-Afrika, ngoLwesine ntambama.
Abadlali beKaizer Chiefs abebenethuba lokugcina beyile e-Ivory Coast (ngoba bebekhona esikwatini obekuzokhethwa kusona), uBruce Bvuma, uSibongiseni Mthethwa noGiven Msimango.
Nokho bonke laba badlali basale ngaphandle eqenjini likaBroos nokuchaza ukuthi bazoyibuka belapha ekhaya imidlalo ye-Afcon.
Omunye umdlali ongeke alubhade kwi-Afcon uLyle Foster ogijima kwiBurnely yase-England.
Nokho mhlawumbe yingoba lo mgadli uke wahlala isikhathi eside engadlali.
Ngaphezu kwalokho, iqembu lakhe belivele like lakuveza ukuthi alithandi asuke eduze kwalo okwamanje njengoba esahlala ngokuxilongwa odokotela.
Imidlalo ye-Afcon izoqala ngoJanuwari 13 ize isongwe ngoFebhuwari 11. Ngalesi sikhathi izobe imile imidlalo yeDStv Premiership.
Selilonke iqembu lesizwe lakuleli limi kanje:
Onozinti: Veli Mothwa, Ronwin Williams noRicardo Goss
Izitobha: Sydney Mobbie, Aubrey Modiba, Nkosinathi Sibisi, Mothobi Mvala, Siyanda Xulu, Grant Kekana, Khuliso Mudau noTerrence Mashigo
Abasesiswini: Teboho Mokoena, Thapelo Maseko, Thapelo Morena, Thabang Monare, Sphephelo Sithole noJayden Adams
FUNDA NALA: Isizathu esenze abeSwallows bafune ukuhola masinyane
Amafolosi: Themba Zwane, Evidence Makgopa, Percy Tau, Zakhele Lepasa, Oswin Appollis, Mihlali Mayambela.
