Kubulawe ngesihluku owayedlala kwi-Arrows

Kuboshwe abesilisa abayisikhombisa, besolwa ngokushaya, balimaze baze bagcine ngokubulala owayengumdlali weGolden Arrows.

Impempe ithole ukuthi uBhekisizwe “Shakira” Nkosi obedlalela i-Arrows ngesizini ka-2013/14 ushone ngasekupheleni konyaka odlule.

Ngokusho komthombo, uNkosi, obeneminyaka engu-34, ubesengene ebhizinisini lezidakamizwa ngemuva kokuthi engenalo iqembu abedlala kulo.

“Kuthe ngoDisemba ngoba engasalidlali ibhola waqashwa enye indoda eKathlehong ukuthi ayidayisele izidakamizwa,” kusho lo mthombo.

“Yena uwenzile lo msebenzi isikhathi eside kodwa ngoDisemba ugolozile, wathi usekhathele ukuwadayisa.

“Kulapho ke le ndoda nabangani bayo bamngenela ngenduku waze washona,” kuchaza umthombo.

Uqhube wathi lamadoda ambulele abanjiwe, azama ukuvika ngokuthi abemjezisa ngoba ewebele imoto.

“Kodwa uphenyo lutholile ukuthi baqamba amanga.” La madoda ayisikhombisa bekulindeleke avele enkantolo ngoLwesibili.

UNkosi ujoyine i-Arrows esuka kwiFC Aziz Kara ngo-Agasti ka-2013. Ubehlale kwi-Aziz Kara kusukela ngo-2010.

Kuthe uma esuka kwi-Arrows waya kwiBaroka FC, nakhona wahlala isikhashana wabe esephelelwa yinkontileka nokuyila ephume khona ebholeni elikhokhelayo.

UNkosi ufihlwe ngakubo eKatlehong ngoJanuwari 4.