Ukhona nje ozophakamisa isandla abe yiqhawe leBafana kwi-Afcon?
SIHLE NGUBO
Njengoba kuzoqala imidlalo ye-Africa Cup of Nations (Afcon) e-Ivory Coast, kwiBafana Bafana kubhekwe abadlali abathile ukuthi bayishayele amagoli.
Phambilini iqembu lesizwe lakuleli belinabo abadlali abebefike baphakamise isandla, baqhulule amagoli kwi-Afcon.
Ngo-1998 uBenni McCarthy waba ngumdlali wokuqala (nowokugcina) ukushaya amagoli amathathu emdlalweni owodwa we-Afcon.
Ngalowo nyaka uMcCarthy wagcina ehlohle amagoli ayisikhombisa, kwaba wukuzethula kwakhe kubalandeli bakuleli.
UBenni ulandelwa uShaun Bartlett oseke wabeka phakathi ayisithupha kwi-Afcon.
Endaweni yesithathu kukhona uSiyabonga “Bhele” Nomvete oshaye amahlanu.
UJohn “Shoes” Moshoeu noMark Williams sebeke bashaya amane umdlali emunye kuyona i-Afcon.
Kusukela ngo-2004 akekho umdlali oseshaye amagoli adlula kwamane kulo mqhudelwano.
Lokhu kuchaza ukuthi sekuphele iminyaka engu-20 yonke kwagcina ukuba nomdlali weBafana ovelelayo ngamagoli.
Amathemba eNingizimu Afrika uma kukhulunywa ngokushaya amagoli, alele kuPercy Tau, Evidence Makgopa, Zakhele Lepasa noTegoho Mokoena.
FUNDA NALA:Â Kubulawe ngesihluku owayedlala kwi-Arrows
Kuzocaca uma sekuqhubeka umqhudelwano ukuthi ubani ongeke alishalazele ipali kubadlali abaqokwe uHugo Broos.
