U-Elias Pelembe ungene emabhukwini amahle omlando we-Afcon

Ukaputeni weMozambique, u-Elias Pelembe, uqophe umlando ngokuba wumdlali odlala phakathi omdala kunabo bonke ukudlala i-Africa Cup of Nations (Afcon).

U-Elias Pelembe, oneminyaka engu-40 ukwenze lokhu ngesikhathi ezakhe zibambana ne-Egypt ngo 2-2 emdlalweni wokuvula we-Afcon kaGroup B, eStade Felix Houphouet-Boigny, e-Abidjan, ngeSonto.

Ngokudlala kwi-Afcon eseneminyaka engu-40, uphule irekhodi likaHossam Hassan wase-Egypt, odlale kulo mqhudelwano ena-39 ngo-2006. 

U-Elias Pelembe uyinkunzi emdwayidwa esidlalele amaqembu amaningi eNingizimu Afrika. 

Lapha sibala iSuperSport United, iMamelodi Sundowns, iBidvest Wits, iPolokwane City neRoyal AM.

Lo mdlali uqale ukudlalela iqembu lakhe lesizwe ngo-2004 kanti usedlale imidlalo engaphezulu kuka-100 eminyakeni engu-20. 

ENingizimu Afrika uwine isicoco seligi kathathu namaqembu ehlukene.

Uqale ukuwina iligi neSuperSport, wayiphinda neSundowns neWits. Uphinde wawina iNedbank Cup neSundowns ngesizini ka-2014/2015.

Omunye umdlali obekhona kwiMozambique u-Edmilson Dove weKaizer Chiefs, odlale kahle kakhulu emuva.

IMambas idlale kahle kakhulu kulo mdlalo, ibhekene nabadlali abayingozi abafana nokaputeni we-Egypt, uMohhamed Salah, odlala kwiLiverpool yase-England.

FUNDA NALA: Owenkulisa yeChiefs uphawula ngabahlwithwe yiqembu elikhulu

Ekugcineni i-Egypt ithole iphenathi (sekwengezwe imizuzu eyisikhombisa unompempe), wayibeka phakathi uSalah umdlalo waphela ngo 2-2 umdlalo.