Kukhonye abeStellies emiklomelweni yeDStv Premiership

January 25, 2024 Admin 2543 Views

U-Iqraam Rayners uqokwe njengomdlali ovelele kwiDStv Premiership ngezinyanga uNovemba noDisemba.

Okwesithathu lo mdlali enqoba lo mklomelo njengoba awunqoba nangoMashi no-Ephreli 2023.

Umqeqeshi weStellenbosch FC, uSteve Barker, wenze umsebenzi oncomekayo kuleli qembu elizinze eCape Winelands futhi nguye othathe umklomelo womqeqeshi ovelele kwiDStv Premiership ngoNovemba/Disemba.

UBarker wagcina ukunqoba lo mklomelo eminyakeni emibili edlule.

Wawunqoba ngoMeyi 2022. Unqoba lo mklomelo nje uBarker usebenze into ebonakalayo kwiDStv Premiership ngalesi sikhathi.

IStellies sinqobe imidlalo emihlanu kweyisithupha esiyidlale phakathi kukaNovemba noDisemba.

Ophawulekayo kulesi sikhathi yilo ashaya kuwo i-Orlando Pirates, ebuya kade eselandela ngemuva ngo 2-0, wagcina enqobe ngo 3-2.

Amajaji aveze ukuhlabeka kwawo umxhwele ngobuchule bamacebo kaBarker kulo mdlalo.

Uphinde wanqoba kwiRichards Bay, AmaZulu FC, nomakhelwane bakhe iCape Town Spurs neCape Town City.

Kulesi sikhathi iStellies siqoqe amaphuzu angu-15 kwangu-16, yashaya amagoli angu-10, yangenelwa amane nje kuphela.

Kuso lesi sikhathi uRayners ushayele iStellies amagoli amane, okusize leli qembu linyukele endaweni yesine kwilogi.

URayners unqobe lo mklomelo ewubanga no-Evidence Makgopa (Orlando Pirates), Luyolo Slatsha (Cape Town City).

UBarker yeba ubencintisana no-Eric Tinkler (Cape Town City) noJose Riveiro (Orlando Pirates), kanti uCavin Johnson (Kaizer Chiefs) naye uvelile kancane.

Kungokokuqala emlandweni wale miklomelo ukuthi iStellenbosch iwine yomibili owomdlali nowomqeqeshi ngenyanga efanayo.

Umdlali weMamelodi Sundowns uSipho Mbule ube ngumdlali wesibili kumaBrazilians ukunqoba umklomelo wegoli lenyanga.

Uwunqobe ngegoli alishaya ekude ngesikhathi iqembu lakhe lihlula iCape Town Spurs ngo 3-0 eLoftus ngoDisemba.