Angase avumbuke eSoweto oxoshwe yiSwallows ngoLwesihlanu

Kuvela igama le-Orlando Pirates neleSuperSport United emagameni amaqembu angase asayine kuwo umdlali wasemuva oxoshwe kwiMoroka Swallows ngoLwesihlanu.

Umdlali wasemuva, uKeagan Allan unikezwe incwadi emkhululayo ukuba ajoyine iqembu alithandayo ngosuku lokugcina lokusayinwa kwabadlali kwiPSL. 

Ngokubika kweSABC Sport u-Allan ushiyile kwiMoroka Swallows ngemuva kokuyijoyina ngoJuni esuka kwi-University of Pretoria. 

Lo mdlali oneminyaka engu-23 ube ngomunye wabadlali ababalulekile eqenjini likamqeqeshi uSteve Komphela kule sizini. 

Kulindeleke ukuthi lo mdlali odlala emuva aphinde avuke kwenye ikilabhu emasontweni ambalwa ezayo.

Kodwa okuhle ngaye wukuthi yena akavimbekile njengoba sekuvalwe iwindi lokubhalisa abadlali nje.

IMoroka Swallows ixoshe abadlali abangu-22 ngesonto eledlule ngesincomo sikasihlalo wesigungu sangaphakathi sokuqondiswa kwezigwegwe.

U-Allan ube ngoka-23 kubadlali abaxoshiwe kuleli qembu elibheke  nezinkinga zezimali kanti kusalindeleke kuxoshwe nabanye. 

Impempe isithole ukuthi u-Allan ngeke aliswele iqembu azodlala kulo njengoba evele kukhona abecuthise izindlebe efuna ukuzwa isimo sakhe siphetha kanjani.

“Indlela adlale ngayo kusukela efike kwiSwallows ikhombise ukuthi ungumdlali osezingeni,” kusho osondelene neSwallows.

“Bekuvele kunamaqembu abesazoya kwiSwallows ayocela ukuba adayiselwe yena manje asezomthola kalula.

“Abaphathi bebethi bazokubambezela ukuhamba kwakhe nabanye abese bezwile ukuthi bafunwa amanye amaqembu ukuze bathole okuthile ngabo.

“Kodwa ukusheshe kuvalwe kwewindi kuziphazamisile lezo zinhlelo. Ngeke ngithuke uma kuphela iviki elizayo esenalo elinye iqembu.

FUNDA NALA: Sihoxisiwe isigwebo sikaRegragui, uzoba khona koweBafana

“Ngike ngezwa kukhulunywa nge-Orlando Pirates neSuperSport United. Kukhona nelaseKapa kodwa ngazi yiliphi.”