Ngabe ‘isitshulu esiphekwa’ uNabi kwiChiefs sizokwehla esiphundu?
SIHLE NGUBO
Umqeqeshi weKaizer Chiefs, uNasreddine Nabi, ubukeka ‘epheka isitshulu’ esizokwenza bamunce iminwe (ngenxa yobumnandi) abalandeli beqembu laseNaturena.
Lo mqeqeshi kubhekwe ukuthi abuyise izinsuku zenjabulo kuMakhosi asekuzwa ngabamanye amaqembu ukuthi konje kuwumuzwa onjani ukuqukula indebe. Njengoba kuqala isizini entsha ka-2024/2025, iChiefs ayikwazanga nokudlala kwiMTN8 ngenxa yakho ukubhacaza, okuyenze yaqeda endaweni yeshumi kwilogi, ngesizini edlule.
Ukufika kukaNabi nakanjani kubanika ithemba abalandeli beChiefs. Lokhu ukubona nangendlela abakhuluma ngayo ezinkundleni zokuxhumana.
NgoLwesibili iChiefs iqinisekise ukubuya kukaNjabulo Blom, osemabhukwini eSt Louis FC edlala kwiMLS. Lo mdlali wasesiswini ubolekisiwe kuMakhosi kuze kube sekupheleni kwesizini.
UBlom ufika kwiChiefs nje isanda kulanda uBradley Cross obedlalela iLamontville Golden Arrows. UCross, oneminyaka engu-23 nodlala kwesokunxele emuva, usayine inkontileka yeminyaka emine nezikaNabi.
Uma kubhekwa iqembu elakhiwa uNabi kubukeka kuqinile epalini, kuwukhonkolo emuva, kanti nasesiswini akusakhalisi. Kubadlali abasha beChiefs kukhona unozinti uFiacre Ntwari, obedlalela iTS Galaxy, uBongani Sam ovela kwi-Orlando Pirates, uRushwin Dortley, obekwiCape Town Spurs FC, u-Inacio Miguel, uGaston Sirino, osuka kwiMamelodi Sundowns, uBradley Cross noNjabulo Blom.
Indawo okusabhekwe ukuthi iyiqinise iChiefs ikubagadli. Kubhekiwe ukuthi kuzovalwa iwindi lokusayinisa abadlali esekhona yini umgadli azohlasela ngaye uNabi alekelele uRanga Chivaviro noAshley du Preez. Ngabe isitshulu esiphekwa uNabi sizogcina sehla esiphundu?