U-Evidence Makgopa uchaza ukubaluleka kukaLepasa kuye
Umgadli we-Orlando Pirates neBafana Bafana u-Evidence Makgopa useveze ubudlelwano anabo nozakwabo ongumgadli, uZakhele Lepasa.
Lezi zinsizwa ezisencane zilibanga kwiPirtaes ziphinde zilibange kwiBafana ijezi kodwa kunokungazani, ziyesekana uma izinto zingahambi kahle.
Njengoba laba badlali ababili bePirates bemele iBafana kwi-Africa Cup of Nations e-Ivory Coast, u-Evidence Makgopa nguye oqala imidlalo.
ULepasa yena uvame ukungena esesuka ebhentshini. Kule sizini eqhubekayo yeDStv Premiership, uMakgopa unamagoli amane, uLepasa unamathathu.
Exoxa nabe-iDiski Times eseKarhogo, uMakgopa, oneminyaka engu-20, ube bazwana sengathi bazalwa ndawonye noLepasa.
“Kuhle ngoba nawe uyabona uma nginaye, sihlale sihleka,” ucashunwe esho kanje u-Evidence Makgopa.
“Kwesinye isikhathi kumele wamukele ukuthi ‘kulungile, lo mfana ngincintisana naye kodwa ekugcineni ungumfowethu’.
“Kufanele sibe ngabandawonye ekupheleni kosuku. Ngisho nasezingeni lekilabhu, uma omunye edlala, omunye kumele ameseke akhombise uthando.”
Ukwesekana kubalulekile kakhulu kulaba bagadli ngoba uma behluleka wukubhakusiza inethi, baba yizitha kubalandeli.
U-Evidence Makgopa useke wabhekana nesimo la abalandeli bePirates bebemhhahhameza uma esenkundleni.
Nakhona kwiBafana kukhona abashaya amakhala ngaye, bekhala ngokuthi kukhona abangcono kunaye ongabe kudlala bona.
“Kwesinye isikhathi siyaxoxa sithi ‘kulungile, susa laba bantu (abakhuluma kabi ngathi) engqondweni yakho usebenze’.
“Kwesinye isikhathi… mina nomama wami sikhuluma njalo ngezinto kodwa njengamanje, ngilapha.
“Angikwazi nokumfonela ngoba akanawo uWhatsApp… Futhi kuzomele ugcine uziphakamisa ngokwakho.
“Kodwa njengabagadli, mina noZakes, sazi kangcono. Ungaba nomdlalo omuhle njengomgadli, kodwa ngaphandle kwamagoli, ‘uyisidomu, awuyena umgadli okahle’.
FUNDA NALA: Ubonge abalandeli uLorch evalellisa kwiPirates
“Kunjalo nje – kwesinye isikhathi siyakhuluma ngakho. Sithi ‘Eish bra kunzima, kumele senze okuthile’.”
