Owaduma kwiPirates neBafana usevolontiya kwelama-amesha
Owayengumgadli weKaizer Chiefs ne-Orlando Pirates, uBongani Ndulula, usejoyine iTshwane University of Technology eMalahleni njengoba ezama ukuvuselela impilo yakhe ebholeni.
Leli qembu lidlala esigabeni sama-amesha esenganyelwe yiSafa, ebesesibizwa ngeSAB League.
UNdulula, owazakhela igama nakwiBafana Bafana, ubuyela ebholeni ngemuva kokuhlala iminyaka eminingi engenaqembu.
Ugcine ukudlala ibhola esigabeni esiphezulu kwiChippa United ngo-2017.
I-TUT eMalahleni, ezinze eMpumalanga, imemezele ukusayinwa kukaNdulula ezinkundleni zokuxhumana kuleli sonto.
“I-TUT yaseMalahleni ijabule ngokusayiniswa kowayengumgadli we-Orlando Pirates neKaizer Chiefs, uBongani Ndulula.
“Lokhu kuyingxenye yokududula isifiso sokunyukela kwi-ABC Motsepe League ngesizini ezayo.
“‘UDrogba’ ujoyine iTUT eMalahleni ngokuvolontiya. #TUTeMalahleni #TUTFootball,” kubhala leli qembu.
UNdulula owazalelwa e-Aliwal North e-Eastern Cape, wangena ebholeni elikhokhelayo ngo-2008 edlala kwiBlackburn Rovers.
Ngemuva kokuhlala unyaka owodwa kwiRovers, uNdulula wahlwithwa yiBloemfontein Celtic.
Ushiye iCeltic ngo-2010 wajoyina i-Orlando Pirates ahlala kuyo iminyaka emithathu wabe esedlulela kuMaZulu FC.
Wafike kuMaZulu wakhombisa ukuthi lisekhona ibhola kuye, wabe eselandwa yiChiefs yambuyisela eGoli.
Kodwa ke wahlala isizini eyodwa kuMakhosi ngemuva kokuhluleka wukuqhubeka nomgqigqo ayewuveze Osuthwini.
Ngemuva kokushiya Amakhosi ngo-2015, uNdulula kumthathe cishe unyaka ukuthola ikhaya elisha, walithola esesekhaya e-Eastern Cape kwiChippa United.
Kodwa ukuhlala kwakhe kwiChilli Boys kufike ekupheleni ngo-2017 esahlale izinyanga eziyisithupha nje kuphela kanti uNdulula ubenenkinga yokuthola iqembu kusukela lapho.
FUNDA NALA: UMokwena uphawula ngokuchithwa kweDowns eFNB Stadium
UNdulula, 34, kuthiwa ubheke ukuqhuba izifundo zakhe zokuqeqesha ngesikhathi edlala kwiiTUT yaseMalahleni.
