ISharks izozama ukugcina umgqigqo weCurrie Cup seyibhekene neCheetahs
SIHLE NGUBO
I-Hollywoodbets Shark XV izophinde idlale ekuhambeni emdlalweni weCarling Currie Cup, njengoba izotholana phezulu neToyota Cheetahs, eToyota Stadium, eBloemfontein, ngoLwesihlanu ngo-5 ntambama.
Womabili la maqembu aphezulu kwilogi kulandela ukunqoba imidlalo yawo yokuvula yalo mqhudelwano.
ISharks XV ishaye i-Airlink Pumas ngo 26-24 ekuhambeni ngoLwesihlanu olwedlule, kwathi iCheetahs yadlula ngo 29-27 kwiFidelity ADT Lions ngeSonto.
“Sijabule kakhulu ukunqoba sibhekene nePumas. Indlela esidlale ngayo ibiyinhle futhi ukuqala umqhudelwano ngomphumela onjena kuzolisiza kakhulu iqembu ukuya phambili,” kusho umqeqeshi weSharks XV, uMike Vowles.
Lo mqeqeshi akalishintshanga iqembu elizobhekana neCheetahs, ngaphandle koshintsho oluyimpoqo lapho uDanilo Botha ezongena endaweni kaJannes Potgieter, olimale edolweni emdlalweni odlule.
“Asenzanga izinguquko eziningi. Sibona ukuthi uma iqembu lilokhu lidlala ndawonye, yilapho lizoya ngokuya liba ncono,” kuqhuba uVowles.
“Sifake uDanilo ofike kithina evela kwiDHL Stormers. Udlale ibhola lombhoxo emazingeni aphansi khona laphaya futhi simbona njengomdlali othembisa kakhulu.
“Uyangena endodeni futhi uma eke wangena kahle esitayeleni sethu ngicabanga ukuthi uzoba umdlali wethu omuhle kakhulu.”
UVowles neqembu kumele bazame ukulokhu beba ncono njengoba umqhudelwano uqhubeka.
“Sibheke umdlalo weCheetahs njengelinye ithuba lokwakha umgqigqo, sithole ukubambisana njengeqembu, siphinde sizikale sibhekene neqembu elihle.
“Bayiqembu elihlangene eselidlale isikhathi eside ndawonye. Banabadlali abanamava futhi silindele impi kubona.”
I-Hollywoodbets Sharks ibophele kanje:
1. Cameron Dawson
2. Kerron van Vuuren
3. Simphiwe Ngobese
4. Johan Momsen
5. Deon Slabbert
6. Willem van den Hever
7. Danilo Botha
8. Thomas Dyer (C)
9. Ross Braude
10. Tim Swiel
11. Lyle Matthews
12. Janco Purchase
13. Marnus Potgieter
14. Christie Grobbelaar
15. Chijindu Okonta
Ebhentshini:
16. Bryce Calvert
17. Jaco du Toit
18. Lee-Marvin Mazibuko
19. Sipho Nonyalela
20. Hanu Pieterse
21. Ceano Everson
22. Chris Horak
23. Matthew Fortuin
