UMiddendorp uncome unompempe okokuqala eminyakeni engu-19

Eminyakeni engu-19 eqeqesha kwiPSL, u-Ernst Middendorp ujatshuliswe yisinqumo sonompempe waze wabancoma ngomsebenzi omuhle.

Lesi sigameko esingajwayelekile senzeke ngeSonto ngesikhathi ezika-Ernst Middendorp, iCape Town Spurs zihlula iTS Galaxy.

ISpurs yethuse abaningi, yabuyisa nethemba lokuthi ingalivika izembe ngesikhathi iqumba phansi iGalaxy ngo 2-0 emdlalweni weDStv Premiership.

Nokho kunezinqumo zonompempe ebezishaqisa kulo mdlalo kanti esithathe amehlo kunazo zonke yilesi esijabulise u-Ernst Middendorp.

Umdlalo bewusuya ngasekupheleni ngesikhathi iGalaxy ibekelwa iphenathi.

Lokhu bekulandela ukuthi uTshepo Gumede ebhudubeze uSamir Nurkovic, wabe esewa engaphakathi ebhokisini.

Yize eqale wangabaza unompempe uThabo Mkhabela, kodw augcine eyikhombile emlotheni.

Kodwa kuthe umdlali weGalaxy eselungiselela ukuyikhahlela le phenathi, iphini likanompempe labiza uMkhabela.

Lifike lamhlebela okuthile, wabuya eseyichitha indaba yephenathi, wathi ibhola elisuswe yiSpurs.

Wengeze ngokunika uNurkovic ikhadi eliphuzi, emsola ngokuziwisa ngenhloso yokuthenga iphenathi.

UMiddendorp uthe kwenzeke ubulungiswa, wathi okokuqala kwenzeka lokhu selokhu aqala ukuqeqesha kuleli.

“Kugcine kwenzeke ubulungiswa, akungatshazwa lokho,” kusho lo mqeqeshi kwabezindaba ngemuva komdlalo.

“Bekungokokuqala eminyakeni engu-19 ngiqeqesha kwiPSL kusukela ngo-2005, emidlalweni ebalelwa ku-500.

“Ngiyancoma impela. Ngichazekile iphini likanompempe ebeliseduze kwamifuthi amehlo ami abone kahle.

“Ubone kuyiphenathi futhi ubememeza ethi, ‘iphenathi! Iphenathi!’ kulento yokuxhuana abayifakayo.

“Kuyacaca bebexoxa nalaba abanye. Ngibonga uMdali ukuthi ujike ukucabanga, balilungisa iphutha.