Izinombolo zivuna iChiefs uma ibhekene nePirates kodwa…
SIHLE NGUBO
Sekubalwa amahora ambalwa ngaphambi kokuthi kubhekane izinkunzi zaseSoweto, i-Orlando Pirates neKaizer Chiefs, emdlalweni womkhaya obhekwe ngabomvu.
EZimnyama zizokwamukela izimbangi ezindala, Amakhosi, emdlalweni weDStv Premiership, eFNB Stadium, ngoMgqibelo ngo-3.30 ntambama.
Kuzobe kungumdlalo ka-180 la maqembu, ahlonishwayo eNingizimu Afrika, etholana phezulu emdlalweni womkhaya.
Ngokwezinombolo iKaizer Chiefs izihambela yodwa kodwa umgqigqo wayo wakamuva uphikisana nayo.
IChiefs seyiwine izikhawu ezingu-74 kowomkhaya, kanti iPirates seyiwine kawu-46.
Emidlalweni engu-54 la maqembu adlale ngokulingana.
Ngokwamagoli Amakhosi ahamba phambili njengoba eseshaye angu-228, kanti eZimnyama sezishaye angu-193.
Egcina ukuhlangana la maqembu kuwine iPirates ngo 1-0 ngoNovemba nyakenye.
Nokho kuyaziwa ukuthi indaba yomgqigqo ayisho lutho uma kutholene lezi zinkunzi zaseSoweto.
Empeleni ngokomgqigqo iPirates neKaizer Chiefs bacisho bafane uma kukhulunywa ngemidlalo yeDStv Premiership.
Womabili la maqembu asedlale imidlalo engu-19 kanti ashiyana ngephuzu elilodwa nje kuphela.
IPirates seyiqoqe amaphuzu angu-30 kanti iChiefs seyihlanganise angu-29.
Phakathi nesonto iPirates iyeke elihle ithuba lokunyukela endaweni yesibili kwilogi yeDStv Premiership.
Ibambane neCape Town Spurs ngo 1-1 emdlalweni ebingawunqoba kalula uma kubhekwa amathuba amaningi ewakhile.
Ngaphambi kwalo mdlalo ikwazile ukuthola amaphuzu aphelele ngesikhathi ishaya iPolokwane City ngo 1-0.
Ngasohlangothini lweChiefs nayo ibamba iyeka. Idlale imidlalo emithathu ngokulingana ngaphambi kokuthi ishaye iLamontville Golden Arrows ngo 1-0 phakathi nesonto.
FUNDA NALA: Omunye umdlali obekwiChiefs ujoyine uBilliat eZimbabwe
Sekuyohlaluka eSoccer City ngoMgqibelo ukuthi yiliphi iqembu okuyoshona ilanga abalandeli balo bejabulile, bekwazi nokudla.
