IWanderers yaKwaZulu-Natal isizogijima kwiMotsepe Foundation Championship
SIHLE NGUBO
IKwaZulu-Natal izoba namaqembu amabili kwiMotsepe Foundation Championship ngesizini ezayo, kulandela ukunyuka kweMidlands Wanderers emidlalweni kazwelonke ye-ABC Motsepe League ebanjelwe ePitoli.
Leli qembu lishaye iThames FC yaseNorth West ngo 2-1 lakwazi ukuthola indawo yesithathu, njengoba emathathu amaqembu azonyukela esigabeni seChampionship kulokhu.
IGomora United, edlalelwa uRooi Mahamutsa izobhekana neThe Bees, eqeqeshwa Humphrey Mlwane, kowamanqamu.
La maqembu azodlala lo mdlalo evele esezibekisele indawo yawo kwiMotsepe Foundation Championship.
Akucaci ukuthi izogcina isongiwe yini imidlalo kazwelonke yokuhlunga ye-ABC Motsepe League ebanjelwe ePitoli, njengoba inezigemegeme eziningi selokhu iqalile.
Le midlalo iqale kuvele kunezinkinga njengoba abengekho amaqembu avela ezifundazweni iLimpopo ne-Eastern Cape.
Lezi zifundazwe zihlulekile ukuxazulula izinkinga zazo ezenze ukuthi angaphumi amaqembu obekumele azimele emidlalweni yokuhlunga ka-2025.
Iqalile imidlalo zaphinde zaqhubeka izinkinga njengoba kugcine kudlalwe umdlalo phakathi kweZizwe FC neMidlands Wanderers, ukuze kuphume iqembu ebelizodlala kowandulela owamanqamu.
Lokhu kwenzeke iWanderers seyifake isikhalazo sokuthi kungani ibingadluleli phambili ngoba ibilingana ngamaphuzu nangakho konke neZizwe ebese kuthiwa idlulele phambili.
IWanderers idlalile neZizwe yanqoba ngo 4-0, yase idlulela kowandulela owamanqamu ngoLwesihlanu.
Leli qembu lishaywe yiGomora ngo 1-0 emdlalweni owandulela owamanqamu, ngaleyo ndlela kwadingeka libange indawo yesithathu neThames.
Ukunyuswa kwamaqembu amathathu kwenziwa ukuxoshwa kweRoyal AM yiPremier Soccer League (PSL) okuvule izimbobo kumaligi angazansi kweBetway Premiership.
Kungenzeka nokho le midlalo yokuhlunga igcine ifane nokuthi bekuzidlalelwa nje, njengoba iLimpopo ne-Eastern Cape befake icala enkantolo.
Bakhala ngokuthi imidlalo bekungamele iqhubeke lezi zifundazwe zingekho.
