Uyabheja ngoMaswanganyi ‘ongcono kunoLorch’
Inkakha ye-Orlando Pirates uLawrence ‘Killer’ Maake ikholwa wukuthi uPatrick Maswanganyi uzokwenza kangcono kunoThembinkosi Lorch kumaBhakabhaka.
ULorch ushiye izinkunzi zaseSoweto ekuqaleni konyaka waya kwiMamelodi Sundowns.
Ekhuluma neKickOff, uMaake uthe ubona u-‘Tito’ ezothatha izintambo kuLorch futhi abe yisihlabani esikhulu kwiPirates.
“Isimo se-Orlando Pirates njengamanje sehla-senyuka kodwa kuyethembisa impela,” usho kanje.
“Sengiyaqala ukubona uzinzo, ngiyaqala ukubona abadlali engingababiza njengabajwayele ukuqala imidlalo nabathenjwayo.
“Ngithanda engakubona kuMaswanganyi kwiSoweto Derby. Wenyukela ezingeni engingathanda ukulibona. Wenza izinto zenzeke.”
Ngicabanga ukuthi ngokuhamba kwesikhathi, ngaphandle kokuphazanyiswa ukulimala, umqeqeshi wePirates uzokwazi ukwazi ukuthi ngobani abadlali bakhe abethembayo.”
Kusukela ejoyine iPirates esuka kwiSuperSport United kule sizini, uMaswanganyi ube yisithandwa sabalandeli.
Lo mdlali oneminyaka engu-25 ubudala useshaye amagoli amathathu emidlalweni engu-19 yeligi kuBucs kule sizini.
“Akakwesabi ukubamba ibhola enze noma yini afuna ukuyenza, ngiyathanda ukuthi uyazi ukuthi kufanele athathe nini isinqumo esifanele.
“Bheka nje igoli alakhele uMonnapule Saleng,” kusho uMaake.
“ULorch ufike wasikhombisa ukuthi yini akwazi ukuyenza, kwase kuba nezinye izinto ezingaphandle kwenkundla ezimphazamisayo.
“Ngakho uLorch akakaze athole ukusikhombisa ikhono lakhe ngokuphelele.
“Kodwa ngicabanga ukuthi uMaswanganyi uma enikwa isikhathi nokwesekwa ngokugcwele ngabaphathi nethimba eliseduze naye, angenza kangcono.”
Le nkhakha yePirates iyamethemba uMaswanganyi ukuthi abe nomthelela emidlalweni eminingi kunalokhu okwake kwenziwa uLorch.
“Ngakho-ke, uMaswanganyi, ngenkululeko nokuvuthwa, ukuya phambili uzoba umdlali oligugu. Ngiyambona engena naseqenjini lesizwe.”
Isikhala sikaMaswanganyi sibonakalile ngempelasonto edlule kwiPirates njengoba ebephunyuziwe.
Leli qembu alikwazanga ukudlala ngokukhululeka ngendlela elijwayele ngayo lishaywa yiSekhukhune United ngo 2-1 emdlalweni weDStv Premiership.
FUNDA NALA: IChiefs izokwenza imali enhle ngomdlali emsayine mahhala
Nokho kufanele ukuthi uzobe esekhona ngoLwesithathu uma seyibhekene nomkhaya iMoroka Swallows eDobsonville Stadium.
