Kukhuthazwa isibabuli sePirates ukuthi siyilaxaze

SIHLE NGUBO

Owayedlelela i-Orlando Pirates, uLehlogonolo “Viera” Masalesa, ugqugquzela uRelebohile Mofokeng ukuthi ayishiye phansi iBucs ayodlala phesheya.

Lo mdlali usehehe abantu abaningi selokhu enikwe ithuba lokuzibonakalisa kwiPirates kule sizini.

UMofokeng uyashesha, unejubane kanti uyakwazi nokubeka ibhola enethini.

Ushaye igoli lesibili leZimnyama ngesikhathi zixebula iLamontville Golden Arrows ngo 7 -1 emdlalweni weDStv Premiership, e-Orlando Stadium, ngempelasonto.

UMasalesa, oseke wadlala phesheya, uthi uMofekeng akakhohlwe yindaba yePirates nePremier Soccer League (PSL).

“Uke waya ukuyozama inhlanhla kwiWolves futhi ngifisa ukuthi ahambe manje,” kusho uMasalesa.

“Uzoba kahle ngale (phesheya) kodwa kumele basizwe abadlali abafana naye.

“IWolverhampton izombona bese ithi ungumdlali osezingeni lomhlaba.

“Kungani uMofokeng engavezwa (ebholeni lomhlaba)? Yebo abakabi sesimeni esikahle manje kodwa yima ngikutshele.

“Ngafunda e-Europe ukuthi kuyinto enkulu kakhulu ukuthi ungumdlali webhola ezingeni lomhlaba.

“Yinto enkulu ukuthi udlalela iqembu lakho lesizwe kodwa thina asikwazi lokho.”

Njengoba kuzodlalwa imidlalo yokuhlungela iNdebe yoMhlaba ka-2026, kulindeleke ukuthi uHugo Broos ambize uMofokeng kwiBafana Bafana.

UMasalesa ufisa lo mdlali afakwe eqenjini lakuleli lesizwe ukuze akhule.

“Kumele sibanike ithuba besebancane laba bafana. Kufanele bafike eminyakeni engu-25 sebedlalele iqembu lesizwe kawu-30,” kugcizelela uMasalesa.

FUNDA NALA: UMaduka usakhala ngamaphushana athile yize benqobile

“Usuke usiza bona ukuthi babe nokuthile kuma-CV abo, ezokwenza ukuthi bahehe amaqembu ase-Europe.”