Uyalichitha ‘igoli’ leYanga umhlaziyi wezinqumo zonompempe

ALFRED NGUBANE

UVictor Hlungwane, owayengunompempe ophambili ebholeni lakuleli, uthi iYoung Africans izichithela isikhathi ngokufaka icala kulandela igoli eliphikwe emdlalweni wabo neMamelodi Sundowns. 

Uthi unompempe obephethe lomdlalo weCaf Champions League uyihlabe esikhonkosini echitha ‘igoli’ ebelishaywe yiYanga. 

Leli ‘goli’ lasusa umsindo njengoba abanye bethi laweqa umugqa kanti abanye babethi, lutho kanti neVAR yaseka ukuthi akulona igoli. 

FUNDA NALA: IPirates seyihlwithe esinye isibabuli soSuthu

Kodwa okungabenelisanga abeYanga wukuthi unompempe akayanga ukuyozibonela ngawakhe leli bhola kwiVAR. 

Seyifake isimangalo ngalolu daba kwiCaf njengoba isola ukwenzelela ukusiza iSundowns idlulele kweyandulela owamanqamu. 

Ngokuchaza kukaHlungwane, uthi u-99 %  webhola awuleqanga umugqa wepali ngakho akulona igoli. 

“Asibheke umthetho… Umthetho ongunombolo 10 onquma umphumela womdlalo uthi, ‘Igoli lishaywa uma lonke ibhola liwela umugqa wamapali phakathi kwamapali amabili aqondile ngaphansi kwepali enqamulayo.’ 

“Izithombe ezikhona izokutshela ukuthi ibhola lonke kumele liwele ngaphandle kokushiya isicucu esincane,” usho kanje kwiSABC Sport.

“Manje-ke uma siya kwiYanga, uma siya ku-Aziz uqobo, siyobheka ukuthi lonke ibhola liweqile yini umugqa. 

“Belishesha kakhulu leli bhola, siyabona uma ibhola lisemoyeni ukuthi akulula ukuthi sihlulele.

“Ingabe lonke ibhola liye phezu komugqa? Uyabona kunesiqephu esincane lapho, leso siqeshana esincane noma singamaphesenti angama-99 futhi sishiye ucezu olulodwa (iphesenti) – akulona igoli. 

“Ukube bekuwu-100% phezu komugqa ngabe igoli libaliwe,” kuchaza uHlungwane.

“Ngeke ke kulesi simo sithi yigoli. Leli bhola alizange liweqe lonke umugqa – yisinqumo esihle se-VAR.”