Ngabe ‘indlondlo ye-ABC Motsepe’ ingakuphinda lokho?
SIWE SHOZI
Umqeqeshi osezakhele igama ngokwenyusa amaqembu ezigabeni zeSafa awafake kwi-PSL, uTshepo Motsoeneng ufuna ukukuphinda lokho nakule sizini.
Ekhuluma neMpempe muva nje, Motsoeneng uthi kule sizini isifiso sakhe esikhulu ngeqembu aliqeqeshayo, iNjampela FC, wukuthi liyomela iKwaZulu-Natal emidlalweni yokuhlunga ezoba seKapa.
INjampela ihlezi esicongweni eqoqweni elaziwa ngokuthi yiStream A kanti inamaphuzu angu-35 ngemuva kwemidlalo engu-17.
UMotsoeneng uma ekwazile ukuthatha leli qembu elizinze kwaNongoma alifake kweyokuhlunga kuzobe kungekhona okokuqala enqoba lesi isicoco nalo.
INjampela yiyoba edle isicoco sePrimo Cup ebidlalelwa amaqembu e-ABC Motsepe League eKZN ukulungiselela isizini.
Futhi uzobe engaqali ukuya kule midlalo yokuhlunga njengoba eseke waya neBizana Pondo Chiefs agcina eyifake kwiMotsepe Foundation Championship.
Amanye amaqembu aseke waya nawo kweyokuhlunga kazwelonke kukhona iBCM Stars yase-Eastern Cape, Tornado FC yaseNorthen Cape (kabili) neZizwe United yaseWestern Cape.
FUNDA NALA: Isikhulu seSafa siphendule uMokwena ngemithetho yebhola
Kuzocaca kule mpelasonto ukuthi iNjampela iyakwazi yini ukudla isicoco nokuthi izobhekana naliphi iqembu emdlalweni wokuhlunga elizomela iKZN kwekazwelonke.
